ئەلهۆیێن چیا فڕینە بەسرا و زاخۆ ب سەرپەرشتییا ڕاهێنەرێ نوو چاڤ ل سەركەفتنێ نە
بڕیارە سوبەهی پێنج شەمبی دەست ب هەڤڕكیێن گەڕا 31ێ یا خولا ستێرێن ئیراقێ یا فوتبۆلێ ب ئەنجامدان دو یارییان، ئەلهۆیێن چیا دێ بزاڤێ كەن ل بەسرا نێچیرا خوە بگرن، زاخۆ دێ بزاڤێن دەرمانكرنا برینێن خوە یێن خوسارەتیان ب سەرپەرشتییا ڕاهێنەرێ خوە یێ نوو كەت.
دهۆك گەشبینە سەركەفتنا دەهێ بەرانبەر هەڤڕكا خوە بینت
سوبەهی ل دەمژمێر 5:30 ئێڤاری جەماوەر و حەز ژێكەرێن تیما فوتبۆلا یانەیا دهۆك چاڤەڕێ دیتنا یارییا تیما خوە بەرانبەر خودانێن ئەردی یانەیا نەفت ئەلبەسرا ئەوا دێ ل یاریگەها فەیحا ل باژێرێ بەسرا هێتە كرن، ئەڤ یارییە د بیتە دیدارا 17 یا هەردو یانەیان دناڤبەرا ئێك دا دكەن، ئەلهۆیێن چیا شیاینە نەهـ سەركەفتنان بینن، پێنچ خوسارەتی هەبن دگەل دو وەكهەڤییان، رەوشا تیما دهۆكێ یا باشە ئەوا د گەڕا بۆری دا سەركەفتن ئینایین و خالێن خوە گەهاندینە 44 خالان رێزا حەفتێ دهێت، بەرۆڤاژی تیما نەفت ئەلبەسرا د كاودانەكێ خراب دایە ئەوا ل رێزا 18ێ دهێت ب كۆمكرنا 24 خالان، ئەڤ یارییە بۆ هەردو یانەیان گرنگە، دهۆك دێ بزاڤێن زێدەتر پێشڤەچوونێ كەت زێدەباری هەبوونا شەش یاریێن پاشئێخستی وەكو بەلانس بۆ زێدەكرنا خالان، دبەرانبەر دا یانەیا نەفت دێ شەڕێ بۆس ێ خالان كەت پێخەمەت خۆ دوورئێخستن ژ ڕێزبەندییا پاشڤەچوونێ.
یاریێن دهۆكێ یێن پاشئێخستی
ژبەركو تیما فوتبۆلا یانەیا دهۆكێ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ كۆپایێ ب دەستڤە بینت، د دەمێ قارەمانیێ دا فدراسیۆنا فوتبۆلا ئیراقێ دەلیڤە دابوو دهۆكێ یاریێن وێ بهێنە پاشئێخستن بوخاترا ئەڤێ قارەمانیێ كو سەرجەمێ و بوونە شەش یاری و ب ڤی رەِنگی، بەرانبەر تەلەبە ل بەغدا، دگەل شورتە ل دهۆكێ، بەرانبەر هەولێرێ ل هەولێرا پایتەخت، دگەل نەفت میسان ل دهۆكێ و دێ بیتە مێڤانا یانەیا دیالا و یارییا شەشێ مێڤاندارییا یانەیا مینا یە بەسرایی بكەت.
گۆلكەرێن ئەلهۆیێن چیا د خولێ دا
تیما دهۆكێ خوانا دەهـ یاریزانێن پشكداری د تۆماركرنا 32 گۆلان دا هەیە بڤی ڕەنگی، پیتەر گۆرگیس حەفت گۆل، پاشەنگ عەبدوللا شەش گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، زانا عەلی و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
كوڕێن خابووری بەرانبەر تاقیكرنەكا بزەحمەت دانە
ل ئەینییا بهێت پێشبینی دهێتە كرن دۆبارە یاریگەها یانەیا زاخۆ ب جەماوەرێ خوە پڕبیت ژبۆ پشتەڤانی تیمێ ئەوا دێ ل دەمژمێر 8:30 شەڤ مێڤاندارییا یانەیا زەورا یا بەغدایی كەت ئێك ژ تیمێن هەڤڕك بۆ رێزبەندیێ و ناسناڤێ وەرزێ ئەڤ سالە، یارییا ئەڤ جارە بۆ كوڕێن خابووری جودایە و ب هێزە كو دبیتە یارییا ئێكێ بۆ ڕاهێنەرێ نوو شەهەد عەبدولغەنی ئەوێ بەری دو رۆژان ئەركێ ڕاهێنەراتیێ وەرگرتی دەرئەنجامێ ژ دەستكاركێشیانا ڕاهێنەرێ وان یێ بەرێ وی تەلال ئەلبلۆشی پشتی ئەنجامێن لاواز و خوسارەتییا دووماهیێ دگەل دیالا ب گۆلەكێ بێ بەرانبەر.
تیما زاخۆ ئەوا نوكە ب53 خالان رێزا دویێ دهێت ژ 15 سەركەفتن، هەشت وەكهەڤی و سێ خوسارەتییان، د بەرانبەر دا یانەیا زەورا سەرێ لیستا خولێ دهێت ب كۆمكرنا 64 خالان، دیدارێن دناڤبەرا هەردو یانەیان دا زەورا شیایە 16 سەركەفتنان بینت زاخۆ چار سەركەفتن ئیناینە بەرانبەر هەشت وەكهەڤییان
كوڕێن خابووری 43 گۆل هەنە
پیشەكارێ یانەیا زاخۆ یێ بەرازیلی گۆستاڤۆ هێنریك ل سەرێ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 13 گۆلان رێزا دویێ دهێت، ناسر محەمەدو پێنج گۆل، ئەحمەد یاسین دو گۆل، دیبیۆتی ئۆگۆنا سێ گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ هەر ئێك گۆلەك تۆماركرینە كو سەرجەمێ گۆلێن زاخۆ بووینە
ئەركێ هەولێر و نەورۆزێ ژی ب زەحمەتن
ژلایێ خوەڤە تیما یانەیا هەولێر سوبەهی ئەینی دەمژمێر 8:30 شەڤ دێ بیتە مێڤانا یانەیا كەربەلا د یارییەكا بهێز دا بۆ كوڕێن كەلهە و منارە ئەوێن د هێلا مەترسیێ دا، ژبەركو رێزا 15ێ دهێن ب كۆمكرنا 35 خالان و چو ڕێك نینن ژبلی سەركەفتنێ، ژلایێ خوە كەربلا ژی شەڕەكێ مەزن دكەت بۆ خۆ قۆرتالكرنێ ئەوا 22 خال هەین رێزا 19ێ و بەری دووماهیێ دهێت.
ژلایەكێ دووڤە یانەیا نەورۆز ل شەمبییا بهێت دەمژمێر 8:30 شەڤ د گرنگترین یاری دا مێڤاندارییا شورتە یا بەغدایی كەت، نەورۆز ب كۆمكرنا 39 خالان رێزا 12 دهێت، شورتە رێزا دویێ دهێت ب كۆمكرنا 62 خالان.
شەش یاریێن مایی بڤی شێوەیی نە
سوبەهی جەوییە- كارەبا دەمژمێر 8:30 شەڤ، رۆژا ئەینی كەرخ- تەلەبە، دەمژمێر 5:30 ئێڤاری، دیالا- نەجەف، دەمژمێر 5:30 ئێڤاری، نەفت- حدود، دەمژمێر 10ی شەڤ، شەمبیێ، نەفت میسان- ئەلقاسم، 5:30 ئێڤاری، ئەلگەرمە- مینا، دەمژمێر 8:30 شەڤ.
هەلوەستێ گشتی پشتی بەری دەستپێكرنا گەڕا 31ێ
1- زەورا 64 خال.
2- شورتە 62 خال كێمتر ئێك یاری.
3- زاخۆ 53 خال.
4- تەلەبە 49 خال كێمتر یارییەك.
5- جەوییە 48 خال.
6- ئەلقاسم 45 خال.
7- دهۆك 44 خال كێمتر شەش یاری.
8- ئەلگەرمە 43 خال.
9- نەفت میسان 43 خال.
10- كارەبا 40 خال.
11- نەفت 40 خال.
12- نەورۆز 39 خال.
13- كەرخ 39 خال.
14- نەجەف 36 خال.
15- هەولێر 35 خال كێمترییا یارییەكێ.
16- مینا 31 خال كێمترییا یارییەكێ.
17- دیالا 28 خال كێمترییا یارییەكێ.
18- نەفت ئەلبەسرا 24 خال.
19- كەربەلا 22 خال.
20- حدود 17 خال.
