26 سالن كارێ وێنەگریێ دكەت
سندس سالح سلێڤانەیی:
وێنەگر (ریاز رەمەزان ئەمین) د دیدارەكێ دا بۆ رۆژنامەیا ئەڤرۆ گۆت: وێنەگری حەزا من یا زارۆكینیێ بوو، ئەڤە (26) سالن ئەز ڤی كاری دكەم و هندی من شیان هەبن دێ یێ بەردەوامبم، چنكو ب كارێ خوە یێ دلخۆش و ئارامم.
هەروەسا گۆت: تشتێ خۆش بۆ من ئەوە جارەكێ من وێنەیێ زارۆكەكی گرت كو ل باغچەی بوو، ئەز ل گەل وی زارۆكی مام هەتا زانكۆ ژی ب دووماهی ئینای من وێنە بۆ گرتن، پشتی مەزن بووی ژیانا هەڤژینیێ پێك ئینای ئەز چوومە داوەتا وی ژی من وێنە بۆ گرتن، بەری چەندەكێ من وێنە بۆ كچا وی ژی گرتن كو ئەو ژی قوتابیا باغچەیە و من دڤێت بێژم گرتنا وێنەیان نە كارەكێ ب ساناهی یە وەكو هندەك بۆ هزر دكەن، هەروەسا داخوازێ ژوان كەسان دكەم یێن كو ژنوو دەست ب وێنەگرتنێ دكەن بلا بۆ خوە سەربۆڕان ژ وێنەگرێن بەری خوە وەربگرن، هەروەسا شیرەتا من بۆ هەموو وێنەگران ئەوە دەمێ ئەو وێنەیان بۆ خەلكەكی دگرن وان وێنەیان باش ب پارێزن و وەكو ئەندامێن مالا خوە ب هژمێرن.
