یانەیا دهۆكێ ژ دادڤانەكێ خولێ ڕازی نینە و سكالا ل سەر تۆماركرییە
ب فەرمی یانەیا دهۆك سكالا ل سەر دادڤانێ خولا ستێرێن ئیراقێ یا فوتبۆلێ زەید سامری ل فدراسیۆنا فوتبۆلا ئیراقێ تۆمار كرییە ژبەر خەلەتیێن وی یێن بەردەوامی بەرانبەر تیما وان د خولێ دا و رۆهنكرنە ژی دایە.
لدووڤ نڤێسارا هاتییە بەلاڤكرن گۆتییە: كارگێرییا یانەیا دهۆكێ ڕێزگرتنەكا تەمام ل سیستەمێ دادڤانییێ و رۆلێ وێ گرنگ د ڕێڤەبرنا یاریێن خولێ دا، مە باوەر هەیە شاشیێن مرۆڤان پارچەیەكن ژ یارییا فوتبۆلێ، لێ مەترسییا دوبارەبوونا خەلەتیێن دادڤانی هەیە ئەوێن كارتیكرنێ دئێخنە ل سەر كاروانێ تیما مە، دادڤان زەید سامر لایەنەكێ مەزنێ توشبوونا تیما مە بۆ ڤان خەلەتییان بوو و شاشیێن وی د یاریێن مە دا بەرانبەر یانەیێن نەجەف، زەورا و نەفت ئەلبەسرا دیارن و بەرچاڤ بووینە كو كارتیكرنا ڕاستەوخوە ل سەر تیمە مە كرینە.
هەر دنڤێسارا خوە دا ئەو حالەتێن د هەرسێ یاریێن ناڤهاتی دا دیار كرینە كو دڤیابا د بەرژوەندییا تیما دهۆكێ دا فیرك لێدابا نموونەیا گۆل نە هژمارتی، دیسان دوورئێخستنا نە دادپەروەرانە یا سەرپەرشتێ تیمێ خالد موشیری، یان ژی بلندكرنا كارتێن زەر بۆ یاریزانێ وان لۆكاس تۆرسی بەرانبەر زەورا كو ژ هەژی نەبوو، دیسان ڕەدكرنا پەنەلتیەكا دروست بۆ تیمێ، هەروەسان ئەو شاشیێن دوبارە یێن دادڤانێ ناڤهاتی د دووماهییا یارییا تیمێ دا بەرانبەر نەفت ئەلبەسرا.
د دەقێ نڤێسارا خوە دا یانەیا دهۆك بەلاڤكرییە: ئەم هوسا دبینن كو بەردەوامییا هەبوونا ڤان بڕیارێن شاش دێ كارتیكرنێ ل سەر ئاستێ تیما مە كەت و گەلەك نیشانێن پرسێ ل پشت خوە دهێلیت، كو ئاستێ هەڤسەنگییا هەڤڕكیێ دناڤبەرا تیمێ دا پەیدا دكەت، هەروەسان دیاركرییە كو تیما دهۆكێ ئێك ژ ستۆنێن خولێ یە و داخوازین لێڤەگەریانەكا هووربین د بڕیارێن دادڤانان دا هەبن و چارەسەرییەكا بلەز بۆ بهێتە كرن داكۆ دەست پاكی یا دیاربیت و مافێ هەموو یانەیان بهێتە پاراستن.
ل دووماهییا نڤێسارا خوە دا گۆتییە: كارگێرییا یانەیێ دێ سكالایا فەرمی دژی دادڤان زەید سامر ل فدراسیۆنا فوتبۆلا ئیراقێ تۆماركەت، داكو بڕیارێن شاش ل پاشەرۆژێ دژی یانەیا دهۆك دوبارە نەكەت و كارتیكرنا وێ د یاریێن بهێت دا دیار نەبن، دوبارە رێزگرتنا مە بۆ فدراسیۆنا فوتبۆلا ئیراقێ و لاپەنێن پەیوەندیدار دۆپات دكەین و داخوازییا مە د چارچووڤەیێ پێشئێخستنا فوتبۆلا ئیراقێ دایە.
