مەها بهێت هەموو فەرمانبەر ژ پارچەیێن ئەردی دێ مفادار بن
هەولێر، قائید میرۆ:
بەرپرسەكێ وەزارەتا باژێرڤانی و گەشتوگوزارێ خویاكر، هەتا نوكە زێدەتری 300 هزار فەرمانبەران رازیبوونا وەرگرتنا پارچەیێن ئەردی هەیە و دبێژیت: هەتا مەها داهاتی هەموو فەرمانبەر دێ مفاداربن و رازیبوون ل سەر ناڤێن وانا دێ هێتە كرن.
سەربەست مەولود، سەرپەرشتیارێ پرۆسا بەلاڤكرنا پارچەیێن ئەردی بۆ رۆژناما ئەڤرۆ دیاركر، د دەمێ نوكە دا زێدەتری 300 هزار فەرمانبەران رازیبوون بۆ وەرگرتنا پارچەیێن ئەردی هەیە و ناڤێن وان دهێنە رەوانەكرن بۆ باژێرڤانیان هەتا ب تیرۆپشك بۆ بهێتە كرن و ئەرد بۆ بهێتە دیاركرن و گۆت: «زۆربەیا فەرمانبەرێن وەزارەتان دووماهی هاتینە و رازیبوون هەیە، ب تنێ وەزارەتا پێشمەرگەی و خانەنشین ماینە، ئەو ژی نوكە كار ل سەر دهێتە كرن بۆ وەرگرتنا رازیبوونێ«.
سەربەست مەولود گۆتژی: «ل چەند رۆژێن بۆری ناڤێن نێزیكی 40 هزار فەرمانبەرێن دی هاتیە پەسەندكرن و ئەم باوەرین د مەها گولانێ دا، دێ رازیبوون بۆ هەموو فەرمانبەران دەركەڤیت، چونكی ئەو ناڤێن مای هەتا نوكە ژ لایێ تەكنیكی ڤە ئاریشە هەیە و پشتی چارەسەركرنێ ئەو ژی ژ وەرگرتنا پارچەیێن ئەردی دێ مفاداربن».
