زاخۆ هێلینا هونەرمەندانە
هه‌رهین محه‌مه‌د:
دەنگبێژێ باژێڕێ زاخۆ غازی سەیرانی د دیدارەکێ دا بۆ ڕۆژناما ئەڤرۆ دیار کر دەستپێکا من یا دەنگبێژیێ ژ وی دەمی دەستێپێکر کو ئەز هێشتا بچویك بووم و ل دیوانا باپیرێ خوە یێ دەنگبێژ ڕەمەزان سمو سەیرانی د ڕوونشتم و من گۆهێ خوە د دا دەنگ و سترانێن وی، هەتا نوکە من هەموو سترانێن وی ژبەرن و ژبیرناکم، ژ وان سترانێن وی د گۆتن وەکو سترانا بەسنا خەلیلا
و حەسەنێ مەلا میسا و میرۆ و سینەم و سەبرومالێ و گدیانۆ، لێ پتر
من حەز ژ سترانا بەسنا خەلیلا کرییە.
ناڤهاتی ئاماژە ب وێ چەندێ ژی کر کو ئەز بابێ دوو کەوێن هونەرمەندم ڕێکێش سەیرانی و سالم سەیرانی، د مالباتا مە دا 7 هونەرمەند دەرکەتینە، و برایێ من یوسف عەلی ژی ل ئێزگێ کوردی ل بەغدا ب شیوەیەکێ ڕاستەوخۆ و تۆمارکری ستران د گۆتن.
گۆت ژی:» ئەز چوومە بەغدا من ل وێرێ باوەرنامە و هونەر و ڕەوشەنبیری ل وێرێ وەرگرت و من خۆ ئاڤا کر، و پاشان چوومە ژ دەرڤەی وەلاتی و 16 سالان ئەز مامە ل وەلاتێ هۆلەندا، و نوکە ژی ئەز ل زاخۆ دژیم».
زێدەتر ژی گۆت:»خەلکێ زاخۆ ڕەوشەنبیر و هونەرمەندن، زاخۆ هێلینا هونەرمەندانە وەکو تاهرێ سەعیدێ عەبۆیی و مەجیدێ عیسایی، دیسان ژ بۆتان ژی هونەرمەند هاتینە زاخۆ وەکو محەمەد عارفێ جزیری و حەسەنێ جزیری و مریەم خانێ و سەعید ئاغایی».
