من دڤێت رۆلێ كه‌سه‌كا (دین) د درامایەكێ دا بگێڕم
سندس سالح سلێڤانه‌یی:
ئه‌كته‌را گه‌نج (ئولین ئه‌دیب) د دیداره‌كێ دا بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: دژیه‌كێ بچووك دا حه‌زا كاكرنێ د بوارێ هونه‌ری دا ل ده‌ف من هه‌بوو، له‌ورا هه‌ر ژ قوتابخانێ من ده‌ستپێكر و پشكداری د هژماره‌كا چالاكیان هه‌روه‌سا چه‌ند شانۆگه‌ریێن قوتابخانێ دا كر و ل گه‌ل بوورینا ده‌می ئه‌ڤ حه‌زه ل گه‌ل من مه‌زن بوو، پشتی هنده‌ك هه‌ڤالان ئه‌ز بۆ ده‌رهێنه‌ران دایمه نیاسین ب دروستی من ده‌ستپێكر و هه‌تا نوكه من پشكداری د دو درامایان دا كریه و بۆ ده‌مێ بهێت ژی هنده‌ك درامایێن دی دێ هه‌بن.
هه‌روه‌سا گۆت: هه‌تا نوكه من دو رۆل د درامایێ دا گێڕاینه، یێ ئێكێ بۆ من گه‌له‌كێ ب زه‌حمه‌ت بوو، چونكۆ به‌رۆڤاژی كه‌سایه‌تیا من بوو، ئه‌ز ب رۆلێ كچه‌كا (25) سالی بووم ب رۆلێ كه‌سه‌كا مه‌زن رادبووم، كو ئه‌و ژی گه‌له‌كا فتنه‌چی و به‌خیل و حه‌سید بوو، كو ئه‌و ژی د درمایا (بارۆڤه) دا بوو، ناڤێ من تێدا (فاتێ) بوو، به‌س رۆلێ من د درامایا (ده‌رگه‌ه) دا گه‌له‌ك بۆ من یێ ب ساناهی بوو، ژ بەر کو كچه‌كا قوتابیا زانكۆیێ بوو، هه‌روه‌سا ژیێ من ل گه‌ل وێ یێ گونجای بوو، بۆ زانین ده‌مێ رۆله‌كی دده‌نه من ئه‌ز دووڤچوونا وان كه‌سان دكه‌م كا چاوا وان ره‌فتاران دكه‌ن، بۆ نموونه ئه‌گه‌ر رۆلێ كه‌سه‌كا فتنه‌چی بده‌نه من ئه‌ز دچم چاڤدێریا وان ژنان دكه‌م ئه‌وێن ل به‌ر ده‌رگه‌هان دروینن ئه‌ز چاڤدێریا لڤین و ئاخفتنێن وان دكه‌م دا ب شێم ب دروستی ب رۆلێ وێ كه‌سێ ڕاببم.
ئه‌كته‌را ناڤبری د لایه‌كێ دی دا گۆت: به‌ری بهێمه دناڤ بۆارێ درامایێ من ستران دگۆتن و پشكداری د فه‌ستیڤالا حه‌فتێ و هه‌شتێ دا كر، هه‌روه‌سا ل گه‌ل تیپا دهۆكێ بووم، لێ ب شێوه‌یه‌كێ ده‌مكی من خوه ژ سترانگۆتنێ دوور كریه، لێ ئه‌ز گه‌له‌ك حه‌زژ سترانگۆتنێ دكه‌م و د هه‌ردو كاران دا (ستران و دراما) یا دلخۆش و ئارامم، بۆ ده‌مێ بهێت هنده‌ك درامایێن دی دێ هه‌بن و ئه‌ز حه‌زدكه‌م رۆلێ كه‌سه‌كا دین یان كه‌سه‌كا گه‌له‌كا تۆره یان شكه‌ستی ببینم دا بشێم دیاربكه‌م كو من شیانێن گێڕانا وان رۆلان ژی هه‌یه.
ل دووماهیێ (ئولین ئه‌دیب) گۆت: ده‌مێ من ده‌ستپێكری هنده‌ك ئاسته‌نگ هه‌بوون، لێ دایك و باب هه‌روه‌سا هه‌ڤژینێ من پشته‌ڤانێن من بوون و ئه‌ز دشێم بێژم ئه‌و بۆ من وه‌كو چیایه‌كی بوون، له‌ورا داخوازێ ژ هه‌ر كچه‌كێ یان ژنه‌كێ دكه‌م ئه‌وێن حه‌زا هونه‌ری هه‌ین بلا ده‌ست ژ خه‌ونێن خوه به‌رنه‌ده‌ن و پشت راستبن دێ رۆژه‌ك هێت ببنه ستێر، لێ بۆ هه‌ر سه‌ركه‌فتنه‌كێ پشته‌ڤانیا دایك و بابا یا پێدڤیه.
