گیانەوەرێن ژ دەرڤە دهێن سێ حەفتیان دێ هێنە گەرەنتینەكرن
هەولێر، قائید میرۆ:
ب مەرەما پاراستنا گیانێ وەلاتیان و رێگریكرن ژ بەلاڤبوونا تایا خوینبەربوونێ، هەر گیانەوەرەكێ بهێتە د ناڤا كوردستانێ دا، سێ حەفتیان دێ هێتە كەرەنتینەكرن و بەرپرسەكێ وەزارەتا چاندنێ ژی دبێژیت: هەموو رێكارێن خۆپارێزیێ بەرچاڤ هاتینە وەرگرتن.
هێمن سەید موراد، رێڤەبەرێ گشتیێ چاندنێ ل پارێزگەها هەولێرێ بۆ رۆژناما ئەڤرۆ دیاركر، ئینانا ئاژەلان ل پارێزگەهێن د بن دەستهەلاتا حكومەتا ئیراقێ ڤە نەمایە، ژ بەركو بهایێ ئاژەلان ل پارێزگەهێن هەرێما كوردستانێ ئەرزانترە، لەوڕا ئاژەل ل هەرێمێ بۆ پارێزگەهێن ناڤەڕاست و باشوورێ ئیراقێ دهێنە هنارتن و گۆت: «هەموو رێكارێن خۆ پارێزیێ ژی بەرچاڤ هاتینە وەرگرتن بۆ پاراستنا گیانێ وەلاتیان ژ تایا خوینبەربوونێ».
گۆتژی: «ب مەرەما پاراستنا گیانێ وەلاتیێن هەرێما كوردستانێ، هەموو ئاژەلێن ژ دەرڤە دهێنە د ناڤا هەرێما كوردستانێ دا بۆدەمێ سێ حەفتیان دهێنە كەرەنتینەكرن، هەتا پشتڕاستبین چو نەخۆشی نینە و نابنە مەترسی بۆ سەر ژیانا وەلاتیان، ب تایبەتی د دەمێ نوكە دا، تایا خوینبەربوونێ ل ئیراق و هەرێما كوردستانێ یا بەلاڤ دبیت و چەندین حالەت هاتینە تۆماركرن».
