كۆنفرانسەكێ نێڤدەولەتی یێ ژنان ل هەولێرێ هاتە ئەنجامدان
دلڤین رەشید:
سەرپەرشتا كۆنفرانسێ دەنگێ ژنان بێ سنۆر بۆ رۆژناما ئەڤرۆ دیاركر، ئێكەم كۆنفرانسێ دەنگێ ژنان بێ سنۆر ب دەست پێشخەریا رێكخراوا ئاژ یا نەحكومی و ب پشتەڤانیا وەزارەتا دەرڤە یا فرەنسا و ب ئامادەبوونا 60 ژنێن رۆژنامەڤان و خودان دەنگ و كاریگەر ل سەرانسەری رۆژهەلاتا ناڤەراست و باكوورێ ئەفریقیا و ئەورۆپا ل هەولێرێ هاتە گێڕان.
شەیدا حوسامی، سەرپەرشتا كۆنفرانسێ دەنگێ ژنان بێ سنۆر گۆت: «ژنێن رۆژنامەڤان و چالاكڤان ل دەڤەرێن هەڤڕكی و پشتی شەڕ و ئالوزیان د هەردو ژینگەهێن جڤاكی و د پیشەیا خۆ دا بەرهنگاری چەندین ئاستەنگان دبن، بەلێ د گەل هندێ دا دبەردەوامن ژ بەرەڤانیكرنێ ژ مافێ مرۆڤی، ئاشتیێ و گەلەك جاران ژیانا وان دكەڤیتە د مەترسیێ دا».
گۆتژی: «ئارمانج ژ ڤی كۆنفرانسی پێشڤەبرنا ئاشتی و پێشخستنا شیانین ژنێن رۆژنامەڤان و چالاكڤانە، داكو جهێ وان د ناڤ جڤاكی دا بهێز ببیت و بەرەڤانیێ ژ مافێن خۆ بكەن، دیسا ئەم دخوازین ب رێكا ڤی كۆنفرانسی داخوازیێن ژنان ل دەڤەرێن جودا جودا ب بهیسین و پاشی ئەنجامان ب راپۆرتەكێ پێشكێشی حكومەتا فرەنسا بكەین».
كۆنفرانس بۆ ماوێ دو رۆژان ل درر بابەتێن مافێ مرۆڤی و ئازادیا رۆژنامەگەری و گوهۆڕینا سەقای و ژیریا دەستكرد ل هەولیرێ ب رێڤەچوو.
