ئەڤرۆ ئاكرەییان چاڤ ل دیرۆكەكا نوویە
رەمەزان زەكەریا
چاڤەڕێ دهێتە كرن ئەڤرۆ ل دەمژمێر سێ ئێڤاری تیما یانەیا ئاكرێ قارەمانا وەرزێ بۆری بزاڤێن سەركەفتنێ و دەربازبوونێ بۆ یارییا دووماهییا كۆپا كوردستانێ بكەت، دەمێ دناڤ ئەرد و جەماوەرێ خوە دا مێڤاندارییا یانەیا هندرین بكەت ژ چارچووڤەیێ قۆناغا پێش دووماهیێ دا،ئەوا پێشوەخت یانەیا زاخۆ دەربازبوویی پشتی سەركەفتن ل سەر كفری ئینابوو ب چار گۆلان بەرانبەر گۆلەكێ، ل دۆر دووماهی بەرهەڤیێن تیما ئاكرێ ڕاهێنەر و یاریزانێن تیمێ بۆچوونا خوە بۆ رۆژنامەیا ئەڤرۆ بڤی شێوەیی دیار كربوون.
ل دەستپێكێ ئەركان مەنسور یاریزان و كاپتنێ تیما ئاكرێ گۆت: پشتی ژ دەستدانا ناسناڤێ خوە یێ وەرزێ بۆری یا خولا نایابا كوردستانێ، مە كار ب هەموو شێوەیان كرییە ئەم ناسناڤێ كۆپا كوردستانێ ژ دەست نەدەین و دەست ڤالا د وەرزێ ئەڤ سالە دا نەبین، لەوما ژی ب هەموو هێزا خوەڤە كار بۆ ب دەستڤەئینانا كۆپا كوردستانێ دكەین ل یاریەكا گرنگ دا دگەل یانەیا هندرێن قارەمانا وەرزێ بۆری یا كۆپا كوردستانێ ل ناڤ ئەردێ خوە ل ئاكرێ یاریا چارگۆشا زێرێن ئەنجامدەین.
زێدەتر ناڤهاتی گۆت ژی: بۆ هەر لایەنەكێ تیمێ تیابەت یێ بەرهەڤی و دەرۆنی ب باشی بەرهەڤیێن خوە كرینە بۆ وێ چەندێ یاریا چارگۆشا زێرین سەركەڤین بەر ب یارییا فینالێ ژی سەركەڤین مە دڤێت ئەڤ سالە ب ناسناڤێ كۆپا كوردستانێ جەماوەرێ یانەیا ئاكرێ دلخۆش بكەین، ژبەركو كارگێریا یانەیێ و راهێنەرو یاریزان هەموو یێ كار بۆ وێ چەندێ دكەن یاریێن مایی سەركەڤین .
ژلایێ خوەڤە هەژار سابر راهێنەرێ یانەیا ئاكرێ بۆچوونا خوە دیاركر و گۆت: تیما یانەیا ئاكرێ گەلەك باش خۆ بەرهەڤكریە بۆ ئەنجامدانا یاریا بەرامبەر یانەیا هندرێن ل چارگۆشا زێرێنا كۆپا كوردستانێ و مە باوەریەكا تەمام ب تیما خوە هەیە سەرەرای چۆنا سێ یاریزانێن باش لێ هێشتا ئەم ب هیڤینە ئەنجامێن باش و دلخۆشكەر ب دەستڤەبینین و بگەهین یاریا فینال.
