یانەیێن كوردستانێ یاریێن ب هێز هەنە و ئەلهۆیێن چیای گەشبینن بۆ سەركەفتنا 15ێ
قەیس وەیس:
بڕیارە ئەڤرۆ دەست ب هەڤڕكیێن گەڕا 32ێ ژ خولا ستێرێن ئیراقێ یا فوتبۆلێ ب ئەنجامدانا دو یارییان بهێتە كرن ئەوێن دێ بەردەوامبن هەتا پێنج شەمبییا بهێت، هەرچار یانەیین كوردستانی د ئەركێن جودا دا، هەردو یانەیێن دهۆك و زاخۆ ل بەغدانە و چاڤ ل سێ خالانە، هەولێرێ دێ دناڤ ئەرد و جەماوەرێ خوە دا شەر بۆ بەردەوامییا سەركەفتنان كەت، نەورۆز دێ بیتە مێڤانا نەجەف.
ئەلهۆیێن چیا گەشبینە نەفتا بەغدا داگیربكەت
چاڤەڕی دهێتە كرن ئەڤرۆ ل دەمژمێر شەشی ئێڤارییا درەنگ تیما فوتبۆلا یانەیا دهۆك ل یاریگەها ئەحمەد ڕازی ببیتە مێڤانا یانەیا نەفت یا بەغدایی د یارییەكا ب هێز دا بۆ هەردو تیمان و پێشبینی دهێتە كرن وەكو هەر یارییەكێ كۆمەكا باش یا جەماوەرێ یانەیا دهۆك دناڤا یاریگەهێ دا بەرهەڤ بیت ژبۆ پشتەڤانییا ئەلهۆیێن چیا، ل دووڤ ڕێزبەندییا لیستێ دهۆكێ 47 خال كۆمكرینە ژ سەرجەمێ 14 سەركەفتنان، پێنج وەكهەڤی و شەش خوسارەتییان و كێمترییا شەش یاریێن پاشئێخستی هەنە ل رێزا هەشتێ دهێت، د بەرانبەر دا خودانا ئەردی یانەیا نەفت 45 خال كۆمكرینە ل رێزا نەهێ دهێت، دیدارێن دناڤبەرا هەردو یانەیان دا دهۆكێ نەهـ سەركەفتن بەرانبەر پێنج خوسارەتی و هەشت وەكهەڤی هەنە.
یاریێن دهۆكێ یێن پاشئێخستی
ژبەركو تیما فوتبۆلا یانەیا دهۆكێ موژیلی یاریێن كۆپا كەنداڤی بوو و شیابوو ب سەرفەرازی ناسناڤێ كۆپایێ ب دەستڤە بینت، د دەمێ قارەمانیێ دا فدراسیۆنا فوتبۆلا ئیراقێ دەلیڤە دابوو دهۆكێ یاریێن وێ بهێنە پاشئێخستن بوخاترا ئەڤێ قارەمانیێ كو سەرجەمێ و بوونە شەش یاری و ب ڤی رەنگی، بەرانبەر تەلەبە ل بەغدا، دگەل شورتە ل دهۆكێ، بەرانبەر هەولێرێ ل هەولێرا پایتەخت، دگەل نەفت میسان ل دهۆكێ و دێ بیتە مێڤانا یانەیا دیالا و یارییا شەشێ مێڤاندارییا یانەیا مینا یە بەسرایی بكەت.
یاریزانێن دهۆكێ 32 گۆل تۆمار كرینە
تیما دهۆكێ خوانا دەهـ یاریزانێن پشكداری د تۆمار كرنا 32 گۆلان دا هەیە سەرجەمێ 33 گۆلان و بڤی ڕەنگی، پیتەر گۆرگیس حەفت گۆل، پاشەنگ عەبدوللا حەفت گۆل، كەریم دەرویش پێنچ گۆل، هەر ئێك ژ و شەرقی ئەلبەحری و مارلۆن دۆسانتۆس، یانیك زاكێری و ئیبراهیم غازی هەر ئێك دو گۆل هەنە، هەروەسان هەر ئێك ژ بەیار ئەبۆ بەكر، كێلبرت كۆمسۆن، سیابەند عەگید، زانا عەلی و لۆكاس هێنریك گۆلەك تۆماركرینە، گۆلەك بۆ یاریزانەكێ یانەیەكا دی هاتییە هژمارتن، پشتی ب شاشی ڤە گۆل ل سەر تیما خوە كر.
مەسعۆد میرال: هەموو بزاڤێن مە ئەون ل سەر ئەنجامێن باش بەردەوامبین
د دیدارەكەكا رۆژنامەڤانی دا مەسعۆد میرال ڕاهێنەرێ تیما یانەیا دهۆكێ دیار كر یاریزانێن وان د بەرهەڤبن بۆ یارییا ئەڤرۆ و ئەوا د شیان دا بیت دڤێت دناڤ یاریگەهێ دا بهێتە كرن و گۆت: پێنەڤێت هەموو یاری ب سانەهی نینن و هەر تیمەك شەڕی بۆ سێ خالان دكەن، ئەم دێ هەموو بزاڤان كەین ل سەر ئەنجامێن خوە یێن باش بەردەوامبین، یاریزانێن مە هەموو جهێ باوەریێ نە، تیما نەفت ژ تیمێن باشن و ب هێز، بۆ مە گرنگ بەردەوام جەماوەرێ خوە كەیفخوەش بكەین.
زاخۆ دێ بزاڤێن قەتاندنا تێلێن كارەبایێ كەت
پشتی وەكهەڤییەكا گرنگ و بۆ ئێكەم یاری ب سەرپەرشتییا ڕاهێنەرێ خوە یێ نوو عەبدولغەنی شەهەد بڕیارە سوبەهی چارشەمبی ل دەمژمێر 8:30 شەڤ تیما فوتبۆلا یانەیا زاخۆ ل پایتەختێ ئیراقێ بەغدا ببیتە مێڤانا یانەیا كارەبا دناڤا یاریگەها زەورا یا نێڤدەولەتی دا كو دبیتە ئێك ژ یاریێن گرنگ بۆ كوڕێن خابووری ئەوێن د نوكە دا رێزا سێیێ دهێت ب كۆمكرنا 53 خالان ژ15 سەركەفتن، هەشت وەكهەڤی و حەفت خوسارەتییان، دیدارێن ئاگرین دناڤبەرا هەردو تیمان دا هاتینە ئەنجامدان، زاخۆ نەهـ سەركەفتن هەبووینە بەرانبەر 10 بۆ كارەبا و د شەش یارییان دا وەكهەڤی هاتیە، تیما كارەبا خودانا 41 خالانە ڕێزا 11ێ دهێت، پێشبینی دهێتە كرن یارییەكا ئاگرین دناڤبەرا هەردو تیما ندا بیت.
مەهەكە زاخۆ گۆل تۆمارنەكرینە
د دووماهی یاری دا زاخۆ سەركەفتن ئینایی یارییا بەرانبەر شورتە بوو ئەوا ب گۆلەكێ بێ بەرانبەر ب دووماهی هاتی ل چارێ نیسانا بۆری، پشتی ڤێ یاریێ بۆ پێنج یارییان ل دووڤ ئێك گۆلكەرێن زاخۆ نە شیاینە هیچ گۆلەكێ تۆماربكەن دگەل هەر ئێك ژ، كەربەلا، نەفت میسان، نەورۆز، دیالا و زاخۆ، لێ ب گشتی شیاینە 43 گۆلان د خولێ دا بینن و بەلاڤكرینە ل سەر یاریزانان و بڤی شێوەیی، پیشەكارێ یانەیا زاخۆ یێ بەرازیلی گۆستاڤۆ هێنریك ل سەرێ لیستا گۆلكەرێن تیما خوە دهێت ب تۆماركرنا 16 گۆلان، هەڤالێ وی و یاریزانێ هەلبژارتیێ ئیراقێ ئەمجەد عتوان ب تۆماركرنا 13 گۆلان رێزا دویێ دهێت، ناسر محەمەدو پێنج گۆل، ئەحمەد یاسین دو گۆل، دیبیۆتی ئۆگۆنا سێ گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز، پاتریك مارسێلۆ هەر ئێك گۆلەك تۆماركرینە كو سەرجەمێ گۆلێن زاخۆ بووینە.
هەولێر گەشبینە دیارییەكێ بدەتە جەماوەرێ خوە
ژلایێ خوەڤە تیما یانەیا هەولێرێ گەشبینە سوبەهی دناڤ ئەرد و جەماوەرێ خوە دا سەركەفتنەكێ بكەتە دیاری بۆ پشتەڤانێن خوە دەمێ سوبەهی ل دەمژمێر شەشێ ئێڤارییەكا درەنگ مێڤاندارییا یانەیا نەفت میسان بكەت ئێك ژ یاریێن ئاگرین بۆ كوڕێن كەلهە ومنارە، هەموو بزاڤێن هەولێرییان بەردەوامییا سەركەفتنانە پێخەمەت هێشتا پێشڤەچوون و خوە دووركرن ژ ڕێزبەندیێن مەترسی بۆ داكەفتنێ ئەوا نوكە ب38 خالان رێزا 14ێ دهێت، ژلایێ خوەڤە نەفت میسان ئێك ژ تیمێن ب زەحمەت ل رێزا نەهێ دهێت ب كۆمكرنا 42 خالان.
نەورۆز مێڤانا نەجەفە
ژلایێ خوەڤە تیما یانەیا نەورۆز پێنچ شەمبییا بهێت دێ ل باشوورێ ئیراقێ بیتە مێڤانا یانەیا نەجەف ئەوا دێ ل دەمژمێر شەشێ ئێڤارییا درەنگ هێتە كرن، تیما باژێرێ سلێمانیێ خودانا 38 خالانە ژ 10 سەركەفتن، هەشت وەكهەڤی و 12 خوسارەتی ل رێزا 13ێ دهێت و بزاڤێن وێ وەكو هەولێرییان خوە قورتالكرنە ژ ڕێزبەندیێن مەترسیدار بۆ داكەفتنێ، یانەیا نەجەف دهەمان مەترسی دایە ئەوا رێزا 15ێ دهێت ب37 خالان.
ئەو یاریێن مایی یێن د ڤان هەرسێ رۆژان دا
یارییا ئەڤرۆ، تەلەبە دێ كەربەلا ل دەمژمێر 8:30 شەڤ مێڤان كەت، سوبەهی چارشەمبی، حدود و نەفت ئەلبەسرە ل دەمژمێر شەشێ ئێڤارییا درەنگ، ئەلگەرمە دێ بیتە مێڤانا ئەلقاسم دەمژمێر 8:30 شەڤ، پێنج شەمبیێ مینا مێڤاندارییا جەوییە كەت دەمژمێر شەشێ ئێڤاری، دیالا مێڤانا زەورایە دەمژمێر 8:30 شەڤ، د هەمان دەم داش ورتە ل یاریگەها شەعب مێڤاندارییا كەرخ كەت.
هەلوەستێ گشتی بەری دەستپێكرنا یاریێن گەڕا 32ێ
1- زەورا 65 خال.
2- شورتە 65 خال, كێمترییا یارییەكێ.
3- زاخۆ 53 خال، كێمترییا یارییەكێ.
4- تەلەبە 52 خال، كێمترییا یارییەكێ.
5- جەوییە 49 خال.
6- ئەلقاسم 48 خال.
7- دهۆك 47 خال كێمترییا شەش یارییان.
8- نەفت 45 خال.
9- نەفت میسان 43 خال، كێمترییا یارییەكێ.
10- ئەلگەرمە 43 خال.
11- كارەبا 41 خال.
12- كەرخ 39 خال.
13- نەورۆز 38 خال، كێمترییا یارییەكێ.
14- هەولێر 38 خال، كێمترییا یارییەكێ.
15- نەجەف 37 خال.
16- مینا 34 خال، كێمترییا یارییەكێ.
17- دیالا 28 خال، كێمترییا یارییەكێ.
18- نەفت ئەلبەسرا 24 خال.
19- كەربەلا 22 خال.
20- حدود 17 خال.
