بۆ وێنەگرتنێ ل هەموو وەلاتێن ئۆرۆپی گەڕیایە
زنار تۆڤی:
وێنەگر (عیسام سەیدوش) خەلكێ دەڤەرا زۆمارە و ئەڤە 35 سالن ل وەلاتێ دانیمارك دژیت، د دیدارەكێ دا بۆ رۆژنامەیا ئەڤرۆ دبێژیت: د گەنجاتیا خوە دا من حەزژ كارێ وێنەگریێ دكر و هەتا نوكە یێ بەردەوامم، هەروەسا بۆ دەمەكێ درێژ من ژیانا خوە ل دەڤەرێن چیایی بۆراندیە، دناڤ چیایان دا مرۆڤ ئەسمانی و ستێرا و سیلاڤ و كەڤر و بەران دبینیت، ب رەنگەكێ گشتی مرۆڤ سروشتی و جوانیا وی دبینیت، پشتی ئەز هاتیمە ئورۆپا ژی ب رەنگەكێ بەردەوام من كارێ وێنەگرتنێ دكر، ل سالا 2007 ێ، ئەز هاتمە نیاسین وەكو وێنەگرەكێ جیهانی یێ پیشەكار ل وەلاتێ دانیمارك، هەروەسا من پشكداری د چەندین خۆلێن ب هێز یێن وێنەگرتنێ دا كرینە و من چەندین باوەرنامە وەرگرتینە.
هەروەسا گۆت: بۆ كارێ وێنەگرتنێ ئەز ل هەموو وەلاتێن ئورۆپی گەڕیایمە، ل باكورێ ئورۆپا ئەز پتر وێنەیان دگرم، هەروەسا من سەرەدانا كوردستانێ ژی كرییە و من ل چەندین دەڤەر و باژێرێن كوردستانێ ژی وێنەگرتینە، من وێنەیێن چەندین سیلاڤان ل ئیسلەندا و سویسرا گرتینە، ب تنێ وێنەیێن سروشتی دگرم و هەتا نوكە من پشكداری د چەندین پێشانگەهێن وێنەگریێ یێن جیهانی دا كریە و وێنەێن من بووینە یێن ئێكێ و ئەز وێنەیێن خوە ل فەیسبووكێ خوە بەلاڤ دكەم، دیسان من چەندین دیدار ل رۆژنامە و گۆڤارێن دانیماركی و عەرەبی بەلاڤكرینە، نوكە باشترین وێنەگر ل كوردستانێ هەنە، بەلێ مخابن، خەلك ژینگەها كوردستانێ پیس دكەن و دخوازم خەلك بەرمایكێن نە هاڤێژن و ژینگەها خوە بپارێزن، بەری حەفتییەكێ من سەەردانا كوردستانێ كر و من چەندین وێنە ل دەڤەرێن جودا یێن كوردستانێ گرتن.
