سەمیر عەبدولقادر: ژ هەژی ناسناڤی بووین و دێ پلان بۆ نایابا كوردستانێ هێتە دانان
رەمەزان زەكەریا
د داخویانیەكێ دا سەرۆكێ یانەیا بەردەڕەش كەیفخوەشییا خوە دیار كر ب دەستڤەئینانا تیما وان یا فوتبۆلێ ب ناسناڤێ خولا پلا دو و دەربازبوون بۆ پلا نایاب و ئاماژە دا ب دانانا پلانان بۆ وەرزێ بهێت پێخەمەت دەربازبوون بۆن ایابا كوردستانێ، ئەڤ چەندە هات پشتی تیما وان شیایی د یارییا فینالێ دا ب گۆلەكێ سەركەڤیت ل سەر یانەیا شێخان و پلێتا ئێكسەر یا دەربازبوونێ بۆ پلا ئێك وەربگریت.
زێدەتر سەمیر عەبدولقادر بۆ رۆژنامەیا ئەڤرۆ گۆت: ل دەسپێكا وەرزێ خولا پلە دو یا كوردستانێ مە باوەرییەكا مەزن ب پێكهاتەیێ تیما خوە هەبوو كو دێ بنە هەڤڕكێن بزەحمەت بۆ دەربازبوو و شیان بگەهنە ڤێ قۆناغێ، هەموو یاریزان د وەرزێ ئەڤ سالە دا ئاستەكێ مەزن و ژ هەژی دەستخوەشیێ نیشان دابوو، دكۆما خوە دا ڕێزا ئێكێ ب سەرفەرازی دەربازكر و ئەو ئارمانجا مە دڤیایی گەهشتینێ ئەوژی ببنە قارەمان و دەربازبینە پلا ئێك، لێ ئەڤە بتنێ بەس نابی تدێ بۆ وەرزێ بهێت پلانێن ڕێكخستی هەبن پێخەمەت دەربازبوون بۆ پلا نایابێ ژی و ئەڤە مافێ هەر یانەیەكێ یە و ئەوا د شیان دا بیت دگەل پشتەڤانییا دارایی ژلایێ جهێن پەیوەندیدار یانەیا بەردەرەش بەردەوامیێ بدەنە هیڤیێن خوە.
ل دووماهیێ ناڤهاتی ئەوچەندە ژی دیار كر بۆ وەرزێ بهێت ئێك ژ پلانێن وان گرنگی دانە ب تیما خوە یا ئەڤ سالە شیایی ببنە قارەمان بۆ وەرزێ بهێت باشتر ب هێزتر خوە بەرهەڤبكەت پێخەمەت د خولا پلا ئێك ژی دا بشێن هێز و سەنگا تیما خوە پارێزین وەكو قارەمانا پلا دو و شەڕێ بۆ ئێك ژ پلێتێن دەربازبوونێ بكەین.
