د فینالا كۆپایێ دا ئەڤرۆ زاخۆ بەرانبەر دەستكەفتەكێ كوردستانی یە
عەلی حاجی:
چاڤەڕێ دهێتە كرن ئەڤرۆ ل دەمژمێر چارێ ئێڤاری یاریگەها شەهید فرانسۆ حەریری ل هەولێرا پایتەخت مێڤاندارییا یارییا فینالا كۆپا كوردستانێ یا فوتبۆلێ د ناڤبەرا هەردو یانەیێن زاخۆ و هندرین بكەت و كوڕێن خابۆری چاڤ ل دەستكەفتی نە پشتی ژ دەستدانا ناسناڤێ خولا پلا نایابێ، ل دووڤ دووماهی بەرهەڤیێن تیما وان رۆژنامەیا ئەڤرۆ بۆچوونێن جودا وەرگرتینە و بڤێ شێوەیی دیاركریە.
دەستپێکێ بەناڤ ئەحمەد ڕاهێنەرێ تیما زاخۆ دیار کر بۆ وان ئەڤ یاریە ئێک ژ گرنگترین یاریێن ڤی وەرزی یە بۆ تیمێ و گۆت: ژبەرکو د وەرزێ ئەڤ سالە دا مە ناسناڤێ خولێ ژ دەستدا ژبەر هندێ هەمی زوما مە کەڤتە سەر کوپا کوردستانێ و د نوکە دا ئەم یێ ل یاریا دووماهیێ نە و بتنێ ئێک پێنگاڤ مایە ئەم بشێن ڤێ قارەمانیێ ب دەست خوەڤە بینن، یا گرنگە د نوکە دا ئەم هەمی بەرهەڤیان بکەین داکو ب باشترین شێوە د ئامادە بین،تیماهندرێن ژی ژ تیمێن گەلەک ب هێزە و د وەرزێ ئەڤ سالە دا مە یاری ژی ل بەرامبەر ئەنجامداینە و ئەم هێزا وان دزانین و د وێ یاریێ دا مە پێدڤی ب پشتەڤانیەکا باش هەیە ژلایێ کارگێریا یانەیا زاخۆ و جەماوەری ڤە.
ژلایێ خوە عومەر بیبو کاپتنێ تیما زاخۆ گۆت: نابیت ب چو ڕەنگان ئەم ڤی ناسناڤی ژ دەست بدەین ژبەرکو تیما مە ژ هەژیترین تیما ڤی ناسناڤی ب دەستڤە بینیت و ئەم یێ ل سەر ڕێیەکا دروست دچین و پێدڤیە هەمی یاریزان ئەرکێن خوە جێبەجێ بکەن و رێنمایێن ڕاهێنەرێ مە ژی بجهـ بینن و پێدڤیە باشترین ئاست ژی پێشکێش بکەن ژبەرکو تیما مە پتر ئامادە بیت ئەو دێ سەرکەڤتنێ تومار کەت لێ مە باوەرییەکا مەزن ب تیما خوە هەیە کو دێ شێن سەرکەڤتنێ تومار کەن و ناسناڤێ کوپا کوردستانێ بیننە زاخۆ،بۆ مە گرنگە ئەو ناسناڤە بهێتە بەهدینان ژبەرکو ئەڤ ناسناڤە ژ هەژی یە ل دڤەرا بەهدینان بیت.
بۆ زانین تیما یانەیا زاخۆ ل سەر کیستێ یانەیا کفری ب چار گۆلێن پاقژ دەربازبوو یارییا دووماهیێ و یانەیا هندرین ل سەر کیستێ ئاکرێ ب گۆلەکێ بێ بەرانبەر دەربازبوو فینالێ.
