کانیا ئەڤینێ و سترانێ ل زاخۆیە
زاخۆ، دلۆڤان هالۆ:
هونەرمەندا دەنگ خوەش شەهریڤانا کوردی د دیدارەکێ دا بۆ ڕۆژناما ئەڤرۆ دیار کر کو شانازییەکا مەزنە بۆ من و ئەز گەلەك کەیف خوەشم کو من ب جلوبەرگێن کوردی بەشداری د ڤیستەڤالا شەلوشەپك و جلوبەرگێن کوردی دا کری و سترانێن خوە پشکێشی گەلێ خوە یێ زاخۆ کری.
ناڤهاتیێ ئاماژە ب وێ چەندێ ژی کر کو ئەڤ جۆرە ڤیستەڤالە گەلەك گرنگن چونکی هەر مللەتەکێ جیهانێ ب زمان و جلوبەرگێن خوە دهێتە نیاسین، هیڤیدارم هەر سال تشتێن زێدەتر یێن فۆلکوری د ڤێ ڤیستەڤالێ دا هەبن، داکو فۆلکلۆرێ مە بەرزە نەبیت، و بانگەوازیا من بۆ هەموو خۆشك دایکێن مە ئەوە کو بلا جلوبەرگێن کوردی بکەنە بەر زاڕۆکێن خوە، جلێن کوردی یێن زاخۆ و جۆلەمێرگێ و ئۆرمیێ گەلەك سەرنجا من ڕاکێشا، و ل هەمی بەرنامه و شەهیان و ڕێوەڕەسمێن تایبەت جلێن کوردی لبەر خوە دکەم.
گۆت :»ژ بەری 17 سالان هاتمە زاخۆ یا بچووك بوو، لێ نوکە زاخۆ گەلەك مەزن و دەولەمەند بوویە، خەلکەکێ گەلەك هێژانە و مێهڤان پەروەرن و کانیا ئەڤینێ و سترانێ ل زاخۆێە، وەکو هونەرمەند ئەڕدەوان زاخۆیی و ئەیاز یوسف کو من گەلەك گۆهدارییا وان کرییە و سترانێن وان ژی گۆتینە».
