پشتی هلوەشاندنا پەکەکێ دێ گوهۆڕینێن مەزن روو دەن
ئەندامەکا شاندێ ئیمرالیێ دیار دکەت هلوەشاندنا پەکەکێ دێ بیتە دەستپێکەکا نوو و دێ رێ بۆ گوهۆڕینێن گەلەک مەزن ڤەکەت، نابیت هندەک کەس وەسا هزر بکەن ل هەمبەر هلوەشاندنا پەکەکێ چ ناهێتە کرن، بەلکو ب دەمی دێ گوهۆڕینێن گەلەک مەزن روو دەن.
پەروین بولدان ئەنداما شاندێ ئیمرالیێ د داخویانیەکێ دا بۆ دەزگەهێن راگەهاندنا تورکیا دیار کر، بریارا هلوەشاندنا پەکەکێ بریارەکا دیرۆکی یە، ئەو یەک دێ کاریگەریا خوە یا گەلەک مەزن ل سەر سیاسەتا تورکیا هەبیت، نابیت هندەک کەس وەسا هزر بکەن ل هەمبەر هلوەشاندنا پەکەکێ چ ناهێتە کرن، وەسا نینە، بەلکو بریارا هلوەشاندنا پەکەکێ دێ بیتە دەستپێکەکا نوو بۆ کارێن گەلەک مەزن و گۆت: (پشتی بریارا هلوەشاندنا پەکەکێ دێ ل تورکیا گوهۆڕینێن گەلەک مەزن روو دەن، بەری هەر تشتەکێ دێ ب هزاران گرتیێن سیاسی هێنە ئازاد کرن، دێ مەرجێن ئۆجەلانی ل زیندانێ هێنە باشتر کرن و هەروەسا دێ تورکیا بەر ب سیستەمەک نوو و دیموکراتی ڤە چیت، کو بشێت هەموو پرسێن هەی چارەسەر بکەت، بێگومان ئەو یەک ژی گەلەک یا گرنگە).
ناڤهاتیێ ئەو یەک ژی دیار کر، پرۆسیسا نها وەکو سالا ٢٠١٥ نابیت، وی دەمی براستی ژی جڤاکێ تورکیا بۆ ئاشتیێ بەرهەڤ بوو، لێ ئالیێن سیاسی بەرهەڤ نەبوون و گەلەک ئاریشەیێن وان یێن مەزن هەبوون و ژ بەر ناکۆکیان ژی پرۆسیسا ئاشتیێ وی دەمی نەگەهشتە وێ ئەنجاما کو مە هەموویان دخواست، لێ نها رەوشەکا گەلەک جودا هەیە و کارێن گەلەک مەزن ژی هاتینە کرن و دهێتە چاڤەرێکرن بێی چو ئاریشەیەکێ ڤێجارێ ل تورکیا شەڕێ چەندین سالان بهێتە راگرتن و ل تورکیا گوهۆڕینێن گەلەک مەزن روو بدەن و گۆت: (بەرپرسێن تورکیا هەتا نها دگۆتن هەتا پەکەکە ب فەرمی نەهێتە هلوەشاندن ئەو چو ناکەن، لێ نها رەوشەکا دی هاتیە پێش و دڤێت ل تورکیا دەست ب قۆناغەکا نوو بهێتە کرن، دڤێت چاکسازیێن قانوونی و سیاسی بهێنە کرن، وەسا پێنگاڤ ب پێنگاڤ دێ ل تورکیا پرسا کوردی هێتە چارەسەر کرن).
پەروین بولدان ئەو یەک ژی دیار کر، ژ بەر شەڕێ چەندین سالان زیانێن گەلەک مەزن گەهشتنە تورکیا، وەلاتیێن کورد و تورک ب سالانە داخوازا ئاشتیێ و راگرتنا شەڕی دکەن، بەرێز ئۆجەلانی شیا دەست ب قۆناغەکا گەلەک گرنگ و دیرۆکی بکەت، دڤێت دەولەتا تورکیا ژی ئەرکێن خوە بجه بینیت و دەست ب گوهۆڕینێن مەزن بکەت، وی دەمی دێ پرۆسیسا نها بەردەوام بیت و بێگومان دێ ئەنجامێن خوە یێن گەلەک باش ژی هەبن و گۆت: (ب شەڕی چو پرسەک ناهێتە چارەسەرکرن لێ ب ئاشتیێ دێ هەموو پرس هێنە چارەسەرکرن، جڤاکێ تورکیا بۆ ئاشتیێ بەرهەڤە و دڤێت بەرپرسێن دەولەتێ ژی یا پێدڤی بکەن).
