نوكە چو حالەتێن تایا خوینبەربوونێ ل دهۆكێ نینن
دهۆك، لەزگین جوقی:
بەرپرسێ پشكا نەخۆشیێن ڤەگر ل ساخلەمیا پارێزگەها دهۆكێ راگەهاند، نوكە چو حالەتێن نوو یێن تایا خوینبەربوونێ و چو حالەتێن گومان لێكری ژی ل پارێزگەها دهۆكێ نینن، ب تنێ حالەتەك هەبوو، ئەو ژی ژنەك بوو، و گیانێ خۆ ژ دەست دایە.
د. سەگڤان حەسەن، بەرپرسێ پشكا نەخۆشیێن ڤەگر ل ساخلەمیا دهۆكێ بۆ ئەڤرۆ ئاشكرا كر، هەر كەسەكێ سەرەدەریەكا راستەوخۆ ل گەل تەرش و كەوالی بكەت، پێدڤیە خۆ بپارێزیت، دیسا پێدڤیە خەلك بزانیت، نابیت تەرش و كەوال ل مال بهێتە سەرژێكرن، بەلكو پێدڤیە ل جهێن فەرمی بهێتە سەرژێكرن و پشكنینێن ساخلەمیێ بۆ تەرش و كەوالی بهێنە كرن ل بن چاڤدێریا نۆشدارێن ڤێتێرنەری.
ناڤهاتی گۆت: «نەخۆشیا تایا خوینبەربوونێ، نوكە ل پتریا پارێزگەهێن ئیراقێ بەلاڤبوویە، ئەڤ نەخۆشیە هەر ژ سالێن شێستان ل جیهانێ بەلاڤبوویە، ل ئیراقێ نوكە حالەتێن تایا خوینبەربوونێ زێدەبووینە، كو نەخوشیەكا ڤایرۆسییە و ژ تەرش و كەوالی بۆ مرۆڤان دهێتە ڤەگوهاستن، لەو پێدڤیە ئەو كەسێن سەردەریێ ل گەل تەرش و كەوالی دكەن، خۆ بپارێزن».
