شەش یاریزان ژ یانەیا ئافرەتێن دهۆكێ بۆ هەلبژارتیێ ئیراقێ هاتنە داخوازكرن
قەیس وەیس:
ب فەرمی لژنەیا یاریزانێن كچان ل فدراسیۆنا فتبۆلا ئیراقێ لیستەیا دەستپێكی یا هەلبژارتیێ ئیراقێ ل سەر ئاستێ كچان بەلاڤ كر ئەوا ژلایێ ڕاهێنەرێ تیمێ عەبدولوەهاب ئەبولهێل هاتیە داخواز كرن تێدا داخوازا 45 یاریزانان كرینە ئەوا دێ ئەڤرۆ ل یاریگەها ئەللاعب ل پایتەختێ ئیراقێ دەست ب ئێكەم یەكا خوە یا ڕاهێنانێ كەن، خوە بەرهەڤكرن بۆ ڤاڤارتنێن دەربازبوونێ بۆ كۆپا ئاسیا ئەوا بڕیارە هەڤڕكیێن ڤاڤارتنان ل خزیرانا بهێت وەلاتێ تایلەند مێڤاندارییا وێ بكەت و كۆپا ئاسیا دێ ل دەستپێكا سالا بهێت وەلاتێ ئوسترالییا هێتە كرن.
ل دووڤ لیستەیا هاتییە بەلاڤكرن رێژەیا هەرە مەزن یا یاریزانێن كچێن كوردستانی نە، ژ وانا پێنج یاریزانێن یانەیا ئافرەتێن دهۆكێ ئەو ژی، سیپەل شوكر، دەلال تالب، مەروا جیان، هەیفا هاشم، سەحەر فەیسل و مینا سەرحان، لێ د دەستپێكا ڕاهێنانان دا دبیت ئەڤ یاریزانە بەرهەڤ نەبن ژبەر پشكدارییا تیما وان د خولا فوتسالێ دا و یارییەكا ڤەبڕ بۆ یارییا فینالێ ل رۆژا ئەینییا بهێت یا هەیی بەرانبەر سیروانی هەلەبچە، ئەوا دیارییا ئێكێ دا هەردو تیم ب گۆلەكێ وەكهەڤبووین.
بۆ زانین هەلبژارتیێ ئیراقێ یێ كچان بۆ 11 یاریزانی دێ ڤاڤارتنێن دەربازبوونێ د چارچووڤەیێ كۆما دویێ دا بەرانبەر هەلبژارتیێن تەیمۆرا رۆژهەلات، مەنگۆلیا، تایلەند وهندستانێ كەت، ئەوا دێ یارییا ئێكێ ل 23ێ خزیرانێ دەستپێكەت.
