ئێشێن دلی ژ زارۆکەکی بۆ ئێکێ دی جوداهی هەنە
د.سەردار غازی، تایبەتمەندێ زارۆكان و ئێشێن دلی یێن زكماكی دیاركر كو هندەك شاشی ل دەڤ وەلاتیان سەبارەت ئێشێن دلی یێن زكماكی هەنە و گەلەك خەلك دبێژن دكتور زارۆكێ من “ فتحە” یان “ كون” هەیە د دلیدا، هەلبەت هەردو ئێكن بەس زمان جودایە، دیسا گەلەك دهێن جوداهیا زارۆكێ خوە ب زارۆكەكێ دیتر دكەن، بۆ نموونە دێ بێژیت زارۆكەكێ مرۆڤاكە مە هەر ئەڤ نەخۆشیە هەبوو و نۆشداران فلان شیرەت لێكرن، یان ببە دەرڤە بۆ چارەسەریێ، ئەز دبێژمە وەلاتیان ئێشێن دلی ل دەف زارۆكان نە ئێك و دونە، بەلكو ب سەدان ئێشێن دلی یێن زكماكی هەنە و هەر زارۆكەك یێ جودایە ژ ئێكێ دیتر و چ جار زاروكێ خوە دگەل ئێكێ دی (مقارنە) نەكە، ئەو كارێ نۆشدارێن تایبەتمەندە.
د.سردار غازی دیاركر، گەلەك خەلك دبێژن: دكتور ئەز و هەڤژینێ خوە مرۆڤێن ئێك نینین، بۆچی زارۆكێ مە ئاریشا دلی هەیە؟ و گۆت: ئێشێن دلی سەد دەر سەدێ پەیوەندی ب زكماكیێ و قنێتێ ڤە نینە، ئانكو نە هەكە هەڤژین مرۆڤ ئێك بن، زارۆكێ وان دێ ئێشا دلی هەبیت، بەلكو گەلەك فاكتەر بۆ ڤێ چەندێ هەنە و هەكە تە زارۆكەك هەبیت، ئێشەكا دلی هەبیت، پتریا زارۆكێن تە یێن دی دێ دساخلەم بن و هژمارەكا كێم رەنگە ئێكێ دیتر ژی ئاریشەكا دلی هەبیت.
دەربارەی تیشكا سینگی بۆ زارۆكێ كێمتر ژ سالەكێ، د.سەردار دیاركركو گەلەك جارا د تیشكێدا، دل دەردكەڤیت یێ مەزن، بەلكو غودەكا ل سەر دلی هەی دبێژنێ (فایماس) رەنگە پتریا جارا ژ ئەگەرێ مەزنیا وێ دل وەسا د تیشكێ دا دیاركەت، ئەوژی پشتی سالەكێ نامینیت و د تیشكێدا دل سرۆشتی دەردكەڤیتەڤە.
گۆتژی: هەكە زارۆكێ تە ( تەوشیا داون) یان جارا حەلك دبێژنێ ( زارۆكێ مەنگولی) بیت، دڤێت پشكنینا دلی بۆ بهێتەكرن، چونكو 50% ژوان ئاریشێن دلی یێن زكماكی هەنە و دڤێت زوی بهێنە دەستنیشانكرن داكو چارەسەریا وان بهێتەكرن.
هەروەسا دیاركر، چارەسەریا ئێشێن دلی یێن زارۆكان بۆ هەیڤەكێ یە و گەلەك دێ بیتە دو هەیڤ و ئەم گەلەك ژ خەلكی دبینین ئەوێ چارەسەریێ دوبارە دكەن و دێ سەحكەینێ شەش هەیڤە بێی دكتوری هەمان چارەسەریێ وەردگریت، ئەو كارەكێ شاشە، چونكو ل دویف ئاریشێن وی و گەشەیا وی و پشكنینا ئیكۆیێ ئەو چارەسەری دهێتە كێمكرن و زێدەكرن، لەورا پێدڤیە پێگیری ل دووڤ شیرەت و رێنمایێن نۆشداری بهێتەدان، نە ل دویڤ حەز و بووچوونێن خوە.
