ئومێد دێ بیتە نەخۆشخانەیەكا پڕی خزمەت بۆ نەخۆشێن پەنجەشێرێ
دهۆك، لەزگین جۆقی:
ب ئامادەبوونا د. سامان بەرزنجی، وەزیرێ ساخلەمیێ یێ حكومەتا هەرێما كوردستانێ و د. عەلی تەتەر، پارێزگارێ دهۆكێ و د. ئەفراسیاب موسا، رێڤەبەرێ گشتی یێ ساخلەمیا دهۆكێ، قونسلێ ئیتالیا و نوونەرێن رێكخراوا ساخلەمیا جیهانی و ئایسپۆ یا ئیتالی و هژمارەكا رێڤەبەرێن دەزگەهێن ساخلەمیێ و نۆشدار و كارمەندێن ساخلەمیێ، دوهی 13/5/2025 نەخۆشخانەیا ئومێد یا نەخۆشیێن پەنجەشێرێ یا فێركرنێ و سەنتەرێ چارەسەری و چاندنا گولچیسكان هاتنە ڤەكرن.
د. سامان بەرزنجی، وەزیرێ ساخلەمیێ د كۆنفرانسەكێ رۆژنامەڤانی دا گۆت: «خۆشحالم ئەڤرۆ پڕۆژەكێ گەلەكێ گرنگ، ئەو ژی نەخۆشخانەیا ئومێد یا نەخۆشیێن پەنجەشێرێ یە ل پارێزگەها دهۆكێ ڤەدكەین، سوپاسیا سەرۆكێ حكومەتا هەرێما كوردستانێ دكەین، كو بەردەوام پشتەڤانێ كەرتێ ساخلەمیێ یە».
وەزیرێ ساخلەمیێ گۆتژی: «ڤەكرنا نەخۆشخانەیا ئومێد یا 160 تەختی دێ بیتە نەخۆشخانەكا پڕی خزمەت بۆ نەخۆشێن پەنجەشێرێ، جهێ خۆشحالیێ یە، رەوشا پەنجەشێرێ ل پارێزگەهێن هەرێما كوردستانێ ل گەل یێن ئیراقێ گەلەك باشترە، د پلانێن مە دایە خزمەتێن ساخلەمیێ ببەینە دەڤەرداری و ناوچەداریان ژی».
د. عەلی تەتەر، پارێزگارێ دهۆكێ د وی كۆنگرێ رۆژنامەڤانی دا دیاركر، ب سوپاسی ڤە سەرۆكێ حكومەتا هەرێما كوردستانێ گرنگیە تایبەت دایە كەرتێ ساخلەمیێ، هەروەسا سوپاسیا هەمی لایەنان كر یێن بووینە هاریكار بۆ نووژەنكرن و تەرخانكرنا نەخۆشخانەیا ئومێد یا نەخۆشێن پەنجەشێرێ و گۆت: «هژمارەكا نەخۆشخانەیان دێ هێنە ڤەكرن و كەڤنە د خزمەتا وەلاتیێن مە یێن دەڤەرێ دا و د وارێ خزمەتكرن و چارەسەركرنا نەخۆشان دا پێشڤەچوونێن باش هاتینە كرن».
د. ئەفراسیاب موسا، رێڤەبەرێ گشتی یێ ساخلەمیا پارێزگەها دهۆكێ گۆت: «نەخۆشخانەیا ئومێد پڕۆژەكێ گەلەكێ گرنگە بۆ پارێزگەها دهۆكێ، نەخۆشخانەیا ئومێد یا پەنجەشێرێ دێ خزمەتەكا مەزن یا نەخوشێن پەنجەشێرێ ل پارێزگەها دهۆكێ كەتن و مەزنترین نەخۆشخانەیە ل سەر ئاستێ هەرێما كوردستانێ».
