بۆ مانا بارزانى په‌رله‌مان دێ سه‌ره‌دانا لايه‌نێن سياسى كه‌ت
ئه‌ڤرۆ نيوز:
سكرتێرێ په‌رله‌مانێ كوردستانێ ئاشكه‌را كر كو حه‌فتيا داهاتى سه‌رۆكاتيا په‌رله‌مانێ كوردستانێ دێ سه‌ره‌دانا پێنج لايه‌نێن سياسى ل هه‌رێما كوردستانێ كه‌ت دا كو دانوستاندنێ ل سه‌ر دستوور و ويلايه‌تا سه‌رۆكێ هه‌رێما كوردستانێ كه‌ت.
فه‌خره‌دين قادر، سكرتێرێ په‌رله‌مانێ كوردستانێ بۆ مالپه‌رێ فه‌رميێ پارتى ديموكراتى كوردستان گۆت: “بڕياره ل حه‌فتيا داهاتى سه‌رۆكاتيا په‌ره‌له‌مانێ كوردستانێ سه‌ره‌دانا هه‌ر پێنج لايه‌نێن سه‌ره‌كى ل هه‌رێما كوردستانێ بكه‌ت ل دۆر دستوورێ هه‌رێما كوردستانێ، چونكو به‌رى نوكه پرۆژه‌ك بۆ ميكانزما كاركرنێ بۆ دستوورێ كوردستانێ هاتيه پێشكێشكرن و خواندنا ئێكێ بۆ هاتيه كرن؛ ژبلى وێ چه‌ندێ كو دێ د ناڤبه‌را فراكسيۆنان ژى دا دانوستاندن ل سه‌ر هێته كرن”.
گۆتژى: “د هه‌يڤا هه‌شت يا ئه‌ڤ ساله دا، هه‌رێما كوردستانێ دێ رووى ب رووى قووناغه‌كا هه‌ستيار بيت كو دووماهى هاتنه ب ويلايه‌تا سه‌رۆكێ هه‌رێما كوردستانێ هه‌ر ژ به‌ر وێ چه‌ندێ ژى دڤێت كار ب رژدى بۆ دستوورى بهێته كرن”.
