ب سیستەم و شێوازەكێ نوو ئەڤرۆ مۆندیالا جیهانی دێ هێتە كرن
چاڤەڕێ دهێتە كرن ئەڤرۆ ب پشكدارییا 32 یانەیێن جیهانی مۆندیالا 2025ێ ل سەر ئاستێ كێشوەران ل وەلاتێ نەتەوەیێن ئێكگرتیێن ئەمریكا بهێتە كرن كو دهێتە هژمارتن ئێكەم قارەمانی ب سیستەم و شێواز و هژمارەیا زێدەتر یا یانەیان ژ قارەمانیێن پێشتر بهێتە ئەنجامدان.
یانەیێن پشكدار هاتنە بەلاڤكرن ل سەر هەشت كۆمان، هەر كۆمەكێ چار یانە پشكدارن ب شێوەیێ خول ئێك قۆناغ یاریێن وان دێ هێنە كرن، هەردو یانەیێن ڕێزێن ئێكێ و دویێ یێ هەر كومەكێ دێ دەربازبتە قۆناغا 16ێ، هەر هەشت كۆم بڤی شێوەینە.
كۆما ئێكێ: پالمێراس یا بەرازیلی، پۆرتۆ یا پۆرتۆگالی، ئەهلی یا مسری، ئینتەر میامی یا ئەمریكی.
كۆما دویێ: پاریس سانجێرمان یا فرەنسی، ئەتلەتیكۆ مەدرید یا ئسپانی، پۆتاڤۆگۆ یا بەرازیلی، سیاتل ساوندرز یا ئەمریكی.
كۆما سێیێ: بایرن میۆنخ یا ئەلمانی، ئۆكلاند ستی یا ئوسترالی، بۆكا جۆنیور یا ئەرجەنتینی، بەنفیكا یا پۆرتۆگالی.
كۆما چارێ: فلامینگۆ یا بەرازیلی، ریازی یا تۆنسی، چێلسی یا ئنگلتەرا، لۆس ئەنجلۆس یا ئەمریكی.
كۆما پێنجێ: ڕێڤرپلێت یا ئەرجەنتینی، ئۆراوا رێد دامیوندز یا چاپانی، مۆنتێری یا مەكسیكی، ئینتەر میلان یا ئیتالی.
كۆما شەشێ: فلۆمینێنسی یا بەرازیلی، بۆرۆسیا دۆرتمۆند یا ئەلمانی، ئۆلسان هیۆندای یا كوریا باشۆر، میلۆدی سەند داونز یا ئەفریقیا باشۆر.
كۆما حەفتێ: مانچستەر ستی یا ئنگلتەرا، ویداد یا مەغربی، عەین یا ئیماراتی، یۆڤانتۆس یا ئیتالی.
كۆما هەشتێ، ڕیال مەدرید یا ئسپانی، هیلال یا سعۆدی، پادچۆكا یا مەكسیكی، سالزبۆرگ یا نەمسا.
یاریێن ئەڤرۆ دێ هێنە كرن
بایرن میونخ- ئۆكلاند ستی، دەمژمێر حەفتی شەڤ.
پاریس سانجێرمان- ئەتلەتیكۆ مەدرید، دەمژمێر 10ی شەڤ.
پالمێراس- پۆرتۆ، ل دەمژمێر ئێكی شەڤ.
بۆ زانین دێ 63 یاری د 12 یاریگەهان دا هێنە كرن كو دهێتە هژمارتن بۆ جارا ئێكییە د دیرۆكا ڤێ قارەمانیێ دا 32 یانە پشكدارن ل جهێ هەشت یانەیان ئەوا هەر ژ سالا 2000ێ دەستپێكری، قارەمانی دێ هەتا 13ێ مەها بهێت بەردەوامبیت، دیسان بڕیار هاتیە دان بۆ چار سالان جارەكێ بهێتە ڕێكخستن ل جهێ هەر سال.
چەوا یانە هاتینە ژێگرتن؟
ل دووڤ سیستەمێ نووی ێ قارەمانیێ بڤی شێوەیی بووینە، كێشوەرێ ئۆرۆپا 12 یانە، كێشوەرێ ئاسیا چار یانە، كێشوەرێ ئەفریقیا چار یانە، كێشوەرێ ئەمریكا باشۆر شەش یانە، كێشوەرێ ئەمریكا باكۆر و ناڤەڕاست و كاریبی چار یانە، كێشوەریچ ئۆقیانۆسێ ئێك یانە، یانەیەك یا خودانێن ئەردی.
هەر سەركەڤتنە ب دو ملیۆن دۆلارانە
فدراسیۆنا فوتبۆلا جیهانی فیفا ئێك ملیار دۆلار بۆ سەركەڤتیێن ڤێ قارەمانیێ تەرخانكرینە كو دهێتە هژمارتن كۆژمەیەكێ دیرۆكی یە بۆ جارا ئێكێ یە دهێتە دانان دبیت یانەیێن ئۆرۆپایێ مفادارێن سەرەكی بن د بەلاڤكرنا ئەڤان خەلاتان ژبەركو دێ ل دووڤ دەربازبوونا یانەیان قۆناغ بەر ب قۆناغەكا دی، قارەمانا موندیالێ دێ 40 ملیون دۆلاران وەرگریت، تیما دویێ 30 ملیون دۆلار، هەر یانەیەكا سەركەڤتنێ د هەر یارییەكا د سیستەمێ كۆمان دا بینت دێ دو ملیون دۆلاران وەرگریت، هەروەكهەڤییە ب ملیۆن دۆلاران، ئەڤ هژمارەیا خەلاتان وەكرییە هەموو یانەیێن پشكدار ب گرێبەستێن گران بوهان چاڤ ل سەركەڤتنان و دەستڤە ئینانا ناسناڤی بیت، شرۆڤەكارێن وەرزشی پێشبینی دكەن ببیتە ئێك ژ ب هێزترین قارەمانیێن وەرزێ ئەڤ سالە ل سەر ئاستێ جیهانێ.
تۆمارا قارەمانێن مۆندیالێ
هەرچەندە سالێن قارەمانیێ یا ڕێكخستی نەبوو لێ یا بەردەوام بوو، ئێكەم قارەمانی ل سالا 2000 هاتبوو كرن و یانەیا كۆرینتیانز یا بەرازیلی ناسناڤ ب دەستڤە ئینابوو، ل 2005ێ ساۆپاۆلۆ یا بەرازیلی، ل 2006ێ، ئینتەر ناسیونال یا بەرازیلی، ل2007ێ میلان یا ئیتالی، ل2008ێ مانچستەر یۆنایتد، ل2009ێ بەرشەلۆنا یا ئسپانی، ل2010 ئینتەر میلان، ل2011 بەرشەلۆنا، ل2012 كورینتیانز، ل2013ێ بایرن میۆنخ، ل2014ێ ریال مەدرید، ل2015 بەرشەلۆنا، ل 2016 ریال مەدرید، ل2017 ریال مەدرید، ل2018ێ ریال مەدردی، ل2019 لیڤەرپۆل، ل 2020 بایرن میۆیخ، ل2021 چێلسی، ل2022 ریال مەدردید، ل 2023 مانچستەر ستی.
