ئارمانجا مە پاراستنا ڕێزا سێیێ و پشكداری د قارەمانییەكا ژ دەرڤە دایە
د دیدارەكێ دا ستێرێ فوتبۆلا یانەیا زاخۆ یا وەرزشی دیار كر هەموو بزاڤێن وان یێن وەرزێ ئەڤ سالە ئەو بووینە پلێتەكا دەربازبوونێ بۆ ئێك ژ قارەمانیێن دەرڤەیی ئیراقێ و پاراستنا ڕێزا سێیێ دێ ئارمانجا وان بجهئینیت.
زێدەتر یوسف رائید ئەلئالۆسی بۆ رۆژنامەیا ئەڤرۆ گۆت: هەر ژ دەستپێكا وەرزێ ئەڤ سالە یا خولا ستێرێن ئیراقێ كارگێرییا یانەیا زاخۆ ب ئێك ئارمانج ئەم هانداینە ئەو ژی سەركەڤتن ل دووڤ سەركەڤتنان بینن تا بشێن ئێك ژ ڕێزێن پێشیێ ب دەستڤە بینن و ئارمانجا مەزن ئەوە پشكدارییە د ئێك ژ قارەمانیێن دەرڤەیی ئیراقێ، پشتی بۆرینا 35 یارییان ئەم شیایینە ڕێزا سێیێ بهێن ب كۆمكرنا 66 خالان، سێ یاری ماینە، ل دووڤ ڕێزبەندیێ ژ ئەوان هەرسێ یارییان هەكە سەركەڤتنەكا دی بینن دێ وەرزێ ئەڤ سالە ب ڕێزا سێیێ دەستخوەڤە ئینن، لێ ئارمانجا مە ئەوە د هەرسێ یارییان دا ب سەركەڤین.
ژلایەكێ دووڤە ناڤهاتی ئەوچەندە ژی گۆت: شانازیێ دبەم دگەل تیما خوە شیایمە د یارییا بەرانبەر نەفت ئەلبەسرا گۆلا سەركەڤتنێ بینم و ئەو گۆلە بۆ هەموو یاریزانان ڤەدگەڕینم، چنكو ئەم هەموو ب ئێك ئارمانج و دل یاریێ دكەین بۆ ناڤێ زاخۆ.
ژلایەكێ دووڤە بۆ نهێنییا ئاست و ئەنجامێن زاخۆ گۆت: پێنەڤێت دەما كارگێرییا یانەیێ و سەرپەرشتێ ئیدارا سەربەخۆیا زاخۆ پشتەڤانبن، هەروەسان ئەو جەماوەرێ مە یێ نمرە ئێك ل سەر ئاستێ ئیراقێ و ئێگكرتنا یاریزانان ئەڤە هەموو نهێنیێن ئاست و ئەنجامێن زاخۆ نە كو گەهشتینە ڕێزا سێیێ، گەشبینن بۆ وەرزێ بهێت زاخۆ دێ د قارەمانییەكا دەرڤە دا یارییان كەت و ئەڤە ژی ئێك ژ هیڤیێن مە هەموویانە.
