كەیفخوەشم کو ل كوردستانێ خەونا من بجهـ هاتی
نەرمین رێکانی
سترانبێژ و مۆزیكژەن (قێرین مستەفا عجۆ) كو خەلكا باژێرێ عەفرینێ یە ل ژ رۆژئاڤایێ كوردستانێ و ئەڤە چەند سالن ل پارێزگەها دهۆكێ دژیت، د دیدارەكێ دا بۆ رۆژنامەیا ئەڤرۆ گۆت: د ژیەكێ بچووكدا من حەزژ مۆزیكێ دكر، لێ پشتی ژبەر رەوشا سوریێ ل سالا 2014 ئەم هاتینە پارێزگەها دهۆكێ و ل ڤێرە ل گەل دو رێكخراوان ئەو دەلیڤە هات و مە دەستپێكر و نوكە ئەندامم د گرۆپێ مشەخت یێ مۆزیكێ دا كو ل سالا 2017 ب رێكا هندەك هەڤالان ژ دهۆكێ و ئیتالیا هاتیە دامەزراندن.
دەربارەی سترانگۆتنێ ژی گۆت: دوی گرۆپی دا ئەز پتر وەكو سترانبێژ هاتمە نیاسین و مە پشكداری د هژمارەكا ئاهەنگ و چالاكیان دا كریە، ژوان فەستیڤالا سلێمانیێ و (16) رۆژێن دژی توندۆتیژیا ژنان و هندەك ئاهەنگان ل ئۆرۆپا و بۆ من مەرەق بوو ئەز مۆزیكا كوردی ب ژەنم، هەروەسا سترانان ب كوردی بێژم، ژبەر هندێ ل ڤێرە ئەز هەست ب خەریبیێ ناكەم و كەیفخۆشم كو ل كوردستانێ خەونا من بجهـ هاتی.
