شەڕ بەردەوامە و ئسرائیل چاڤەرێی بڕیارا ترامپی یە
شەڕێ د ناڤبەرا ئیرانێ و ئسرائیلێ دا ب دژواری بەردەوام دکەت و بەرپرسەکێ وەزارەتا دەرڤە یا ئسرائیلێ ژی دیار کریە، ئەو دێ بەرنامەیێ ئەتۆمی یێ ئیرانێ ژناڤ بەن و ژ بۆ ڤێ یەکێ ژی ئەو پێدڤی ب هاریکاریا ئەمریکا نە.
شەڕێ د ناڤبەرا ئیرانێ و ئسرائیلێ ب دژواری بەردەوام دکەت و بەرپرسەکێ وەزارەتا دەرڤە یا ئسرائیلێ دیار کریە، وان شیاینە دربێن کوژەک ل ئیرانێ بدەن و گەلەک فەرماندار و ئەفسەرێن ئیرانێ هاتینە کوشتن و نها ئەسمانێ ئیرانێ ل ژێر کۆنترۆلا ئسرائیلێ دایە و ئسرائیل دێ ئێرشی هەموو بنگەهێن سەربازی و ئەتۆمی یێ ئیرانێ کەت و ژ بەر ڤێ یەکێ ژی وان بەری نها داخواز ژ خەلکی کرینە، کو د زووترین دەم دا تەهران چۆل بکەن، چونکی وان نەڤێت وەلاتیێن سڤیل یێن ئیرانێ ببنە قوربانی.
هەمان بەرپرسی کو ناڤی وی نەهاتیە ئاشکرا کرن ئەو یەک ژی دیار کریە، ئەو دوژمنێ گەلێ ئیرانێ نینن، بەلکو ئەو شەڕی بۆ پاراستنا وەلاتێ خوە دکەن و ژ بەر ڤێ یەکێ ژی هەتا ئسرائیل نەگەهیتە ئارمانجێن خوە دێ شەڕێ وان ل دژی ئیرانێ ب دژواری بەردەوام بیت.
ل ئالیێ دی فەرماندارەکێ ئیرانێ ژی دیار کر، وان ب موشەکان جارەکا دی ئێرشی ئسرائیلێ کرینە و دێ ئێرشێن وان ژی بەردەوام بن و عەلی خامنەیی رێبەرێ ئیرانێ ژی دیار کر، ئەو ل هەمبەر ئسرائیلێ بێدەنگ نامینن و دێ ب توندی بەرسڤا ئسرائیلێ دەن.
ئیدارا ترامپی سەبارەت ب شەڕێ نها پشتەڤانیێ ل ئسرائیلێ دکەت، لێ هەتا دەمێ ئامادەکرنا ڤێ راپۆرتێ ژی ئەمریکا ب فەرمی بریارا پشکداریێ د شەڕی دا نەدایە و ئسرائیل ژ بۆ لێدانا بنگەهێ فۆردۆ یێ ئەتۆمی یێ ئیرانێ چاڤەرێی بریارا ترامپی یە، هەکە ئەمریکا ل بنگەهێ فۆردۆ بدەت دێ شەڕ چیتە قووناغەکا نوو.
چاڤدێرێن سیاسی ژی دیار دکەن، ب لێدانا بنگەهێ فۆردۆ دێ بالانسا شەڕی ب تەمامی د بەرژەوەندیا ئسرائیلێ دا هێتە گوهۆڕین و ژ بەر ڤێ یەکێ ژی لۆبیێن ئسرائیلێ ل ئەمریکا نها ترامپی گەلەک تەنگاڤ دکەن کو بریارا شەڕی بدەت، بێگومان هەکە ئەمریکا بریارەکا وەسا بدەت دبیت ئیران و گرۆپێن چەکدار ل رۆژهەلاتا ناڤین ئێرشی بنگەهێن سەربازی یێن ئەمریکا بکەن.
ل ئالیێ دی ئیمانوێل ماکرۆن سەرۆکێ فرەنسا ژی د داخویانیەکێ دا دیار کر، گوهۆڕینا سیستەمێ سیاسی یێ ئیرانێ ب رێکێن سەربازی دێ رۆژهەلاتا ناڤین تووشی ئالۆزیێن گەلەک مەزن کەت، ژ بەر ڤێ یەکێ ژی دڤێت ئەمریکا بزاڤا ڤێ یەکێ بکەت ب رێیا دانوستاندنان بەرنامەیێ ئەتۆمی یێ ئیرانێ بدەتە راگرتن و شەڕ ژی وەسا ب دووماهی بهێت.
