ئیراقێ غه‌دره‌كا مه‌زن ل جۆتیارێن پارێزگه‌ها دهۆكێ كر
سندس سالح سلێڤانه‌یی:
پرۆسه‌یا وه‌رگرتنا گه‌نمێ جۆتیاران ل هه‌رێما كوردستانێ ده‌ستپێكر و جێگرێ رێڤه‌به‌رێ گشتی یێ چاندنێ ل پارێزگه‌ها دهۆكێ دیاركر، ل دووڤ فه‌رمانا وه‌زاره‌تا بازرگانیا ئیراقێ ئه‌ڤ ساله دێ رێژه‌یه‌كا گه‌له‌ك كێم ژ گه‌نمێ جۆتیارێن دهۆكێ هێته وه‌رگرتن و جۆتیار ژی دبێژن: ئه‌ڤ ساله ژی ئیراقێ غه‌دره‌كا مه‌زن ل مه كر.
موسلح حه‌سه‌ن، جێگرێ رێڤه‌به‌رێ گشتی یێ چاندنێ ل پارێزگه‌ها دهۆكێ، د داخۆیانیه‌كا رۆژنامه‌ڤانی دا گۆت: سالانه وه‌زاره‌تا بازرگانیا ئیراقێ رێژه‌یه‌كێ دیار دكه‌ت بۆ وه‌رگرتنا گه‌نمێ جۆتیارێن هه‌رێما كوردستانێ و یۆ ئه‌ڤ ساله ژی بتنێ دێ (400) هزار ته‌نێن گه‌نمی ژ هه‌موو پارێزگه‌هێن هه‌رێما كوردستانێ وه‌رگریت، ژوێ رێژێ ژی، بتنێ (117) هزار و (911) ته‌ن ب رێیا سایلۆیێن مه دێ ژ جۆتیارێن سه‌ر ب پارێزگه‌ها دهۆكێ ڤه هێنه وه‌رگرتن و بۆ زانین ئه‌ڤ رێژه‌یه گه‌له‌كا كێمه و هه‌كه هه‌ر (400) هزار ته‌ن بۆ پارێزگه‌ها دهۆكێ بانه هێشتا كێمه و ئه‌م دبینین هه‌تا بۆ وه‌رگرتنا گه‌نمی ژی بابه‌ت هاتیه سیاسیكرن و ئه‌م ڤێ چه‌ندێ ب باشی نابینین، چنكو دێ غه‌در ل جۆتیارێن مه هێته كرن.
هه‌روه‌سا گۆت: وه‌زاره‌تا بازرگانیا ئیراقێ دێ ب تنێ گه‌نمێ ئاڤی ژ جۆتیاران وه‌رگریت و گه‌نمێ دێم ناوه‌رگریت و گه‌نمێ وان هاتیه به‌رهه‌مئینان لێ ئه‌م نه‌شێین وه‌ربگرین و بۆ چاره‌كرنا ڤێ چه‌ندێ ژی وه‌زاره‌تا چاندنێ ل حكومه‌تا هه‌رێما كوردستانێ گرێبه‌سته‌ك ل گه‌ل دو كۆمپانیان ئیمزاكریه ژ بۆ هندێ ئه‌و وی گه‌نمی، ئانكو یێ (دێم) هه‌ر چو نه‌بیت رێژه‌یه‌كێ ژ وان جۆتیاران وه‌ربگرن ژ بۆ هندێ دا زه‌حمه‌تا وان د به‌ر ئاڤێ دا نه چیت و زیان نه‌گه‌هیته وان، بۆ زانین ئه‌ڤ ساله دێ گه‌نم گرانتر لێ هێت، چنكو هه‌ر نوكه بهایێ هه‌ر ته‌نه‌كێ گه‌هشتیه (550) هزار دیناران و ئه‌م پێشبینی دكه‌ین دێ هێشتا گرانتر لێ هێت، چنكو وه‌لاتێن ده‌وربه‌ری مه ژی (ئیران و سوریا و توركیا) ئه‌و ژی تووشی هشكه‌سالیێ بووینه و ژبه‌ر نه‌هاتن یان كێم بارینا بارانان وانژی كێم گه‌نم به‌رهه‌مئینایه، له‌ورا هه‌ر تشته‌كێ دبازاڕی دا یێ كێم بیت چو پێ نه‌ڤێت دێ بهایێ وی ژی یێ گران بیت.
جه‌میل حه‌سه‌ن، جۆتیاره‌كه دبێژیت: سالانه حكومه‌تا ئیراقێ ڤێ غه‌درێ ل جۆتیارێن هه‌رێما كوردستانێ دكه‌ت و ئه‌م دزانین وه‌ك بابه‌ته‌كێ سیاسی ره‌قتارێ ل گه‌ل مه جۆتیاران ژی دكه‌ن و ئه‌م گه‌له‌ك خۆساره‌ت دبین، چنكو مه گه‌له‌ك جۆتیاران رێژه‌یه‌كا مه‌زن یا گه‌نمی چاندیه و بڤی ره‌نگی دێ زیان گه‌هیته مه هه‌موویان.
عادل تاهر، جۆتیاره‌كێ دی یه ئه‌و ژی دبێژیت: ئه‌ڤه چه‌ند ساله وه‌زاره‌تا بازرگانیا ئیراقێ ڤێ چه‌ندێ ل گه‌ل مه دكه‌ت و ئه‌ڤ چه‌نده نه‌دادی یه، له‌ورا هاوار و داخوازێن خوه دگه‌هینه وه‌زاره‌تا چاندنێ ل حكومه‌تا هه‌رێما كوردستانێ كو ئه‌و بابه‌تێ مه چاره بكه‌ن و گه‌نمێ مه ژمه وه‌ربگرن و هه‌كه نه دێ زیان گه‌هیته مه هه‌موویان.
