چاڤدێرێن سیاسی: دانوستاندنێن ئیرانێ و وەلاتێن ئۆرۆپی چو ئەنجام نابن
چاڤدێرێن سیاسی دیار دکەن، بزاڤێن وەلاتێن ئێکەتیا ئۆرۆپا بۆ راگرتنا شەڕێ د ناڤبەرا ئیرانێ و ئسرائیلێ دا چو ئەنجامێن خوە نابن، چونکی ئەمریکا گرنگیێ نادەتە بزاڤێن وان وەلاتان و ژ بۆ ئسرائیلێ ژی تنێ یا گرنگ هەلوەستێ ئەمریکا یە.
عەباس ئیراقچی وەزیرێ دەرڤە یێ ئیرانێ دوهی دیار کر، هەرچەندە بەرپرسێن ئەمریکا دیار دکەن وان سەبارەت ب ئیرانێ چو بریار نەداینە، لێ ب کریاری نها ئەمریکا پشکداری دا شەڕی دا کریە، ئەمریکا چەکێ گران ددەتە ئسرائیلێ و سیستەمێ بەرەڤانیێ یێ ئەمریکا ل ئسرائیلێ هاتیە جێگرکرن و ژ بەر ڤێ یەکێ ژی ئێدی ئەمریکی نەشێن بێژن وان پشکداری د شەڕی دا نەکرینە.
سەبارەت ب دانوستاندنێن ل گەل وەلاتێن ئۆرۆپی ژی وەزیرێ دەرڤە یێ ئیرانێ دیار کر، دانوستاندن باشن لێ باوەریا وان ب ئەمریکا ناهێت، چونکی دەمێ دانوستاندنێن وان و ئەمریکا بەردەوام بوون ئسرائیلێ ئێرشی ئیرانێ کر و نها ژی مەترسیا بەرفرەهبوونا شەڕی هەیە.
ل ئالیێ دی شەڕێ د ناڤبەرا ئیرانێ و ئسرائیلێ دا ب دژواری بەردەوام دکەت و دوهی د ئەنجاما ئێرشێن ئسرائیلێ ل تەهران، لورستان، کرماشان و باژێرێن دی یێن ئیرانێ دا چەندین فەرماندارێن ئیرانێ هاتنە کوشتن و ل هەمبەر دا ئیرانێ ژی ب موشەکان ئێرشی ئسرائیلێ کر و زیانێن مەزن گەهاندنە وی وەلاتی، وەزیرێ بەرگریێ یێ ئسرائیلێ ژی دیار کر، ئەو دێ ب هەموو شیانێن خوە ئێرشی ئیرانێ کەن و دڤێت بەرنامێ ئەتۆمی یێ ئیرانێ بهێتە ژناڤبرن و ل هەمبەر دا پەیڤدارێ وەزارەتا دەرڤە یا ئیرانێ ژی دیار کر، دڤێت جیهان ل هەمبەر ئێرشێن ئسرائیلێ بێدەنگ نەمینیت، ئسرائیلێ هەموو قانوونێن نێڤدەولەتی بنپێکرینە و د ئەنجاما ئێرشێن ئسرائیلێ دا هەتا نها پتر ژ ٦٠٠ کەسان ل ئیرانێ هاتینە کوشتن و پتر ژ دو هزار کەس ژی بریندار بووینە.
چاڤدێرێن سیاسی ژی دیار دکەن، نها ئارمانجا ئسرائیلێ تنێ ژناڤبرنا بەرنامێ ئەتۆمی یێ ئیرانێ نینە، بەلکو ئسرائیلێ دڤێت دەستهەلاتا نها یا ئیرانێ ژناڤ ببەت، سەرۆک وەزیرێن ئسرائیلێ و بەرپرسێن دی یێن وی وەلاتی د چەند رۆژێن بۆری دا ب رەنگەکێ ئاشکرا دیار کرینە دڤێت خەلک ل دژی دەستهەلاتا نها یا مەلایێن ئیرانێ رابیت، چونکی هەتا دەستهەلاتا نها هەبیت خەلکێ ئیرانێ ژی ئازاد نابیت.
ل گۆر باوەریا چاڤدێرێن سیاسی ئەمریکا چاڤەرێ ڤێ یەکێ یە، ئیران خوە رادەست بکەت و هەموو مەرجێن ئەمریکا قەبوول بکەت، لێ دەستهەلاتا نها یا ئیرانێ تشتەک وەسا ناکەت، ژ بەر ڤێ یەکێ ژی دبیت دەمێ ئیران زێدەتر لاواز بوو ئەمریکا ئێرشی بنگەهێ ئەتۆمی یێ فۆردۆ بکەت و وەسا سەرکەفتنا خوە راگەهینیت، چونکی ئەمریکا نەڤێت باجەکا مەزن بدەت، لێ د هەمان دەمی دا ب هەموو رەنگەکێ ژی هاریکاریا ئسرائیلێ دکەت.
