مەهەپە کار بۆ پێشڤەبرنا قووناغا ئاشتیێ دکەت
دەولەت باخچەلی سەرۆکێ پارتا بزاڤا نەتەوەپەرست یا تورکیا دیار کر، ئەو دێ ل هەموو تورکیا دەست ب کۆمبوونان کەن و ئارمانجا وان دروستکرنا تورکیایەک بێ تیرۆرە و وان دڤێت براتیا د ناڤبەرا کوردان و تورکان دا بهێزتر لێ بهێت و هەموو پرسێن هەی ژی بهێنە چارەسەرکرن.
چاڤدێرێن سیاسی ل تورکیا ژی دیار دکەن، پشتی شەڕێ ئیرانێ و ئسرائیلێ نها رەوشا رۆژهەلاتا ناڤین گەلەک ئالۆزە و تورکیا گەلەک دترسیت کو پشتی ژناڤچوونا رژێما ئیرانێ، ئسرائیل و هەڤپەیمانێن وێ بەرێ خوە بدەنە تورکیا، ژ بەر ڤێ یەکێ ژی دەولەت باخچەلی دەست ب قووناغا ئاشتیێ کر و دخوازیت هەر زوو پەکەکە چەکێن خوە رادەست بکەت و ل هەمبەر دا تورکیا ژی دەست ب چاکسازیێن سیاسی و قانوونی بکەت، لێ هەتا نها پەکەکێ چەکێن خوە رادەست نەکرینە و بەرپرسێن پەکەکێ دبێژن هێشتا ژ ئالیێ دەولەتا تورکیا ڤە ب کریاری چو نەهاتیە کرن.
