ئیران گەفا لێدانا بنگەهێن ئەمریکا یێن ل رۆژهەلاتا ناڤین دکەت
ب، سه‌رجان مەحمود:
پشتی ئێرشا ئەمریکا یا ل سەر سێ بنگەهێن ئەتۆمی یێن ئیرانێ، بەرپرسەکێ وی وەلاتی دیار کریە ئەو دێ ئێرشی هەموو بنگەهێن سەربازی یێن ئەمریکا ل رۆژهەلاتا ناڤین کەن و ترامپ ژی داخواز ژ ئیرانێ دکەت بێی مەرج خوە رادەست بکەت.
فەرماندارەکێ سوپایێ پاسدارێن ئیرانێ دیار کریە، ئێرشا ئەمریکا یا ل سەر بنگەهێن ئەتۆمی یین ئیرانێ راگەهاندنا شەڕی بوو، نها ئیران بەرهەڤە و دێ ئێرشی هەموو بنگەهێن ئەمریکا یێن ل رۆژهەلاتا ناڤین کەت، دڤێت ئەمریکا باجا ئێرشا خوە یا ل سەر بنگەهێن ئەتۆمی یێن ئیرانێ بدەت و ئیرانێ ئەو شیان هەنە دشێت ل هەموو رۆژهەلاتا ناڤین ئێرشی بنگەهێن ئەمریکا بکەت.
ل ئالیێ دی دۆنالد ترامپ سەرۆکێ ئەمریکا ژی پشتی ئێرشا ل سەر بنگەهێن ئەتۆمی یێن ئیرانێ دیار کر، نها مەترسیا ئەتۆمی یا ئیرانێ نەما و دەلیڤەیەکا گەلەک گرنگە ئیران رێیا ئاشتیێ هەلبژێریت، هەکە ئیران ئێرشی بنگەهێن ئەمریکا ل رۆژهەلاتا ناڤین بکەت، ئەمریکا دێ گەلەک بهێزتر ژ ئێرشا ل سەر بنگەهێن ئەتۆمی ئێرشی ئیرانێ کەت و دێ ئیران ژناڤ چیت، ژ بەر ڤێ یەکێ ژی نها دەلیڤەیەکا باش هاتیە پێش و دڤێت ئیران ئاشتیێ قەبوول بکەت.
بەرپرسەکێ وەزارەتا دەرڤە یا ئەمریکا کو نەخواستیە ناڤێ وی بهێتە ئاشکرا کرن بۆ ئاژانسا رویترز دیار کریە، ئیران نها گەلەک لاواز بوویە، دو رێ ل هەمبەر ئیرانێ هەنە، یان دێ ئیران خوە رادەست کەت و هەموو داخوازیێن ئەمریکا قەبوول کەت، یان ژی دێ شەڕ بەردەوام بیت و د دەمەکێ وەسا دا ئەمریکا و ئسرائیل دێ ئیرانێ ژناڤ بەن، لێ هەکە ئیران خوە رادەست بکەت وی دەمی دێ شەڕ ب دووماهی هێت، نها ئەمریکا چاڤدێریا رەوشێ دکەت و هەکە ئیران شاشیەکێ بکەت و ئێرشی بنگەهێن ئەمریکا ل رۆژهەلاتا ناڤین بکەت وی دەمی ئەمریکا و ئسرائیل دێ ب هەموو شیانێن خوە ل ئیرانێ دەن.
سەبارەت ب ئێرشا ئەمریکا یا ل سەر ئیرانێ سەرۆک وەزیرێن بریتانیا ژی دیار کر، وان بەری نها ژی دژبەریا خوە ل هەمبەر بەرنامێ ئەتۆمی یێ ئیرانێ دیار کربوون، نها بەرنامێ ئەتۆمی یێ ئیرانێ ژناڤچوون و باشترە تەهران هزرا شەڕی نەکەت و رێیا دانوستاندنان هەلبژێریت.
چاڤدێرێن سیاسی ژی دیار دکەن، پشتی ئێرشا ئەمریکا یا ل سەر بنگەهێن ئەتۆمی یێن ئیرانێ، نها ئیران گەلەک لاواز بوویە و نەشێت شەڕێ ئەمریکا و ئسرائیلێ بکەت، هەکە ئیران ئێرشی بنگەهێن ئەمریکا بکەت دبیت بریتانیا و هندەک وەلاتێن دی ژی پشتەڤانیێ ل ئەمریکا و ئسرائیلێ بکەن و وی دەمی دێ سیستەمێ نها یێ ئیرانێ ژناڤ چیت و دێ زیانێن گەلەک مەزن ژی گەهنە ئیرانێ، ژ بەر ڤێ یەکێ باشترە ئیران هەموو داخوازیێن ئەمریکا قەبوول بکەت.
