هەكە تەنگئاڤا هورمز بهێتە دائێخستن قەیرانا ئابۆری ل جیهانێ دێ مەزنتر بیت
وەزیرێ دەرڤەیێ ئیراقێ، د. فوئاد حسێن هۆشدارییا وێ چەندێ دا هەكە ئیران تەنگئاڤا هورمز دابئێخیت، دێ بازارێن جیهانێ رۆژانە پێنج ملیۆن بەرمیلان ژ دەست دەن.
وەزارەتا دەرڤەیا ئیراقێ بەیاننامەیەك بەلاڤكر و تێدا هاتیە» ل كۆمبوونا ب لەز یا وەزیرێن دەرڤە یێن وەلاتێن عەرەبی كو ل ستانیۆلێ ل سەر ڤەخواندنا ئیراقێ برێڤەچوو، كارڤەدانا هێرشێن ئیسرائیلێ ل سەر ئیرانێ و كاریگەریێن وێ ل سەر ئاسایش و ئارامییا دەڤەرێ هاتە گەنگەشەكرن».
وەزارەتا دەرڤەیا ئیراقێ ئاماژە كر ژی» د كۆمبوونێدا د. فوئاد حسێن، وەزیرێ دەرڤەیێ ئیراقێ پەیڤەك پێشكێشكر و تێدا گوت: ژبەر جدییەتا رەوشێ ئیراقێ داخواز ڤێ كۆمبوونا ب لەز كریە، هەروەسا ئیراق ژ نێزیك ڤە چاڤدێرییا پێشهاتان دكەت، ب بەرچاڤ وەرگرتنا پێگەهێ جوگرافی و سیاسی و نێزیكییا وێ ژ رەوشێ».
د. فوئاد حسێن د پەیڤا خوە دا رۆهنكر ژی» مەترسییا مەزن تنێ ل ئیرانێ یا سنووردار نینە، بەلكو دێ هەموو دەڤەرێ ڤەگریت، ئەم ژی روو ب روویێ پرسیار و ئاستەنگێن مەزن دبین كو پێدڤی ب هەلوەستێ ئێكلاكەر ب كۆم هەیە و پێدڤییە پێنگاڤێن كریاری بهێنە هاڤێتن بۆ دروستكرنا كاریگەریێ ل سەر هەلوەستێ وەلاتێن ئورۆپی و ئەمریكا».
وەزیرێ دەرڤەیێ ئیراقێ هۆشداری دا ژ بەرفرەهبوونا ململانێیان و ب ئارمانجگرتنا دەزگەهێن ئەتۆمی و پەترۆلی وغازی».
دیاركر ژی» دائێخستنا تەنگئاڤا هورمز، دبیت ببیتە ئەگەرێ ژ دەستدانا رۆژانە نێزیكی پێنج ملیۆن بەرمیلێن پەترۆلێ ل بازارێن جیهانی، ئەڤە ژی دێ قەیرانا ئابۆری ل جیهانێ مەزنتر لێكەت».
رۆهنكر ژی» هیچ كەسەك ل دەڤەرێ ژ شوونوارێن ڤی شەڕی دوور نابیت» .
