وەلاتێن بیانی داخوازا نانێ كوردی دكەن
هێلین سالم:
تەڤرین جەمال، كچەكا خەلكا دهۆكێ یە، بۆ دەمێ چەند سالانە كارێ ناپێژیێ دكەت و دەلیڤەیا كاری بۆ دو كچێن دی ژی رەخساندیە و ب گۆتنا وێ هەر ئێك ژوان هندەك پارە دگەهنێ و دشێن هەتا رادەیەكی هاریكاریا مالێن خوە بكەن.
تەڤرین، كو ژیێ وێ (23) سالن، بۆ رۆژنامەیا ئەڤرۆ دبێژیت: ل سالا 2023 ل مالا خوە من ئەڤ كارە دكر و ب رێكا ئۆنلاین دفرۆت، پشتی سالەكێ ئەز شیام كارگەها بچووك دانم و نوكە دو كچێن دی ژی ل گەل من كاردكەن و رۆژانە (250) هەتا (300) نانان ئەم دپێژین و سوپاس بۆ خودێ بكڕ دمشەنە و ئەم دفرۆشین.
هەروەسا گۆت: داخوازی ل سەر نانێ كوردی ل پتریا پارێزگەهێن هەرێما كوردستانێ و چەند پارێزگەهێن ئیراقێ ژی ل سەر هەنە، هەروەسا نانێ مە بۆ دەرڤەی وەلاتی ژی هاتیە رەوانەكرن، ژوانێ وەلاتێ هندستانێ، هەروەسا رۆسیا ژی و ئەڤە ژی بۆ مە هەموویان جهێ شانازیێ یە كو نانێ تەنك ل دهۆكێ بهێتە چێكرن و بۆ وەلاتێن بیانی بهێتە رەوانەكرن.
