ئاگربەست هاتە راگەهاندن و ئیران گەفان ل ئەمریکا دکەت
سەرۆک وەزیرێن ئسرائیلێ راگەهاند ئەو گەهشتینە پرانیا ئارمانجێن خوە و ژ بەر ڤێ یەکێ ئاگربەست قەبوول کرینە و ئیران ژی دیار دکەت ئسرائیل تووشی شکەستنێ هاتیە و دڤێت ئەمریکا ژی هەموو هێزێن خوە ژ رۆژهەلاتا ناڤین ڤەکێشیت.
سەرۆک وەزیرێن ئسرائیلێ بنیامین نەتانیاهۆ د داخویانیەکێ دا دیار کر، وەکو ئسرائیل وان شیان د دەمەکێ کورت دا مەترسیا ئەتۆمی یا ئیرانێ ل سەر وەلاتێ خوە نەهێلن و هەروەسا سیستەمێ موشەکی یێ ئیرانێ ژی تووشی زیانێن گەلەک مەزن بوویە و ئەو یەک ژ بۆ ئسرائیلێ سەرکەفتنەکا گەلەک مەزن و گۆت: (ل سەر داخوازا ترامپی ئەم ب ئاگربەستا ل گەل ئیرانێ رازی بووینە، لێ د هەمان دەمی دا مە خوە بۆ هەر پێشهاتەکێ ژی بەرهەڤ کریە، هەکە ئیران ئاگربەستێ بنپێ بکەت و ئاریشەیان بۆ مە دروست بکەت دێ ب هەموو شیانێن خوە ل ئیرانێ دەین).
ل ئالیێ دی وەزیرێ دەرڤە یێ ئیرانێ عەباس ئیراقچی ژی راگەهاند، وان شیان ئسرائیلێ تووشی شکەستەکا گەلەک مەزن بکەن و د ئەنجام دا ئسرائیلێ ب رێیا ئەمریکا و هندەک وەلاتێن دی داخوازا ئاگربەستێ کریە و وەکو ئیران ئەو رێ نادەن جارەکا دی ئسرائیل مەترسیێ بۆ ئیرانێ دروست بکەت.
فەرماندارەکێ سوپایێ پاسدارێن ئیرانێ کو ناڤێ وی نەهاتیە ئاشکرا کرن بۆ ئاژانسا ئیرنا یا وی وەلاتی دیار کریە، ئسرائیلێ نەشیا بگەهیتە ئارمانجێن خوە و ئیرانێ شیا ب موشەکێن گەلەک پێشکەفتی دربێن مەزن ل ئسرائیلێ بدەت و د هەمان دەمی دا دڤێت ئەمریکا ژی ئێدی باش بزانیت ئەو نەشێت مەترسیان بۆ وەلاتێ مە دروست بکەت و دڤێت ئەمریکا هەموو هێزێن خوە ژ رۆژهەلاتا ناڤین ڤەکێشیت.
چاڤدێرێن سیاسی ژی دیار دکەن، ئاگربەستا هاتیە راگەهاندن جهێ گومانێ یە و دبیت جارەکا دی شەڕ دەستپێ بکەت، چونکی ئسرائیلێ و ئەمریکا شیان د دەمەکێ کورت دا زیانێن گەلەک مەزن بگەهیننە ئیرانێ و دیارە پشتی راگەهاندنا ئاگربەستێ دێ قووناغەکا نوو دەستپێکەت و دڤێت ئیران پڕانیا داخوازیێن ئەمریکا و ئسرائیلێ قەبوول بکەت، هەکە ئیران تشتەک وەسا نەکەت دێ جارەکا دی ئەمریکا و ئسرائیلێ ئێرشی ئیرانێ کەن.
ل گۆر باوەریا چاڤدێرێن سیاسی رەنگە پشتی راگەهاندنا ئاگربەستێ د ناڤ ئیرانێ دا ئالۆزیێن گەلەک مەزن روو بدەن، چونکی کوشتنا ب دەهان فەرماندارێن ئیرانێ و پتر ژ بیست زانایێن ئەتۆمی سەلماند کو ئیرانێ ئاریشەیێن خوە یێن گەلەک مەزن هەنە و هندەک هێزان شیاینە د ناڤخوەیێ ئیرانێ دا ل ژی وەلاتی وەلاتی کار بکەن، ل ئالیێ دی دبیت خەلک ژی ل دژی دەستهەلاتێ دەست ب خوەنیشادانان بکەن، چونکی وەلاتی ژ سیستەمێ نها گەلەک توورە نە و دبیت ئارمانجا سەرەکی یا ئەمریکا و ئسرائیلێ ژی ئەو بیت دا خەلک ل دژی دەستهەلاتا نها یا لاواز یا ئیرانێ خوەنیشادانان بکەن.
