ئاریشەیا مووچەی دێ هێتە چارەسەركرن
هەولێر، قائید میرۆ:
بریكارێ بەرێ یێ وەزارەتا دارایا ئیراقێ ئاشكراكر، ل نێزیك ئاریشەیا مووچەیێ فەرمانبەران دێ هێتە چارەسەركرن و ئاسایی بوونا رەوشا دەڤەرێ ژی كاریگەری ل سەر رەوشا مووچەی هەیە.
دكتۆر فازل نەبی، بریكارێ بەرێ یێ وەزارەتا دارایا ئیراقێ بۆ رۆژناما ئەڤرۆ گۆت: «ئەز یێ گەشبینم ل نێزیك ئاریشەیا مووچەیێ فەرمانبەرێن هەرێما كوردستانێ ژ لایێ بەغداڤە بهێتە چارەسەركرن، چونكی راگرتنا شەڕی ژی دێ كاریگەری ل سەر چارەسەركرنا پرسا مووچەی هەبیت، ب تایبەتی پشكەكا وان گڤاشتنێن ل سەر هەرێما كوردستانێ سیاسی بووینە نەك دارایی».
دكتۆر فازل گۆتژی: «چارەسەركرنا پرسا مووچەی پێدڤی ب چوونا شاندەكێ بلندێ هەرێما كوردستانێ بۆ بەغدا هەیە، ئەگەر بهێت و شاندەكێ بلند سەرەدانا بەغدا بكەت و هووركاریێن راگرتنا مووچەی بهێنە بەحسكرن، ڤێجارێ دێ ئاریشەیا گیرۆبوونا مووچەی چارەسەر بیت و دوبارە نابیت، ئەز گەلەك یێ گەشبینم ئاریشەیا مووچەیێ فەرمانبەران بهێتە چارەسەركرن، ئەڤە ب تنێ بۆچوونا من نینە، بەلكو د چارچوڤێ وان زانیاریان دایە یێن ب دەست كەفتین ل دۆر چارەسەركرنا پرسا مووچەی».
