پشتی ئاگربەستا شەڕێ ئیرانێ و ئیسرائیلێ فرۆكخانەیا هەولێرێ دەست ب گەشتێن خوە كر
پشتی ل سات 7 سپێدەهییا دوهی سێشەمبی 24/6/2025 ئاگربەستا د ناڤبەرا ئیرانێ و ئیسرائیلێدا چوویە د وارێ بجهئینانێدا، فرۆكخانەیا نێڤدەولەتییا هەولێرێ دەست ب گەشتێن خوە یێن ئەسمانی كر و ئەسمانێ ئیراقێ ژی بۆ گەشتێن ئەسمانی هاتە ڤەكرن.
دوهی سێشەمبی 24/6/2025، ئەحمە هشیار، رێڤەبەرێ گشتیێ فرۆكخانەیا هەولێرێ یا نێڤدەولەتی راگەهاند» پشتی ڤەكرنا ئەسمانێ ئیراقێ، گەشتێن ئەسمانی یێن فرۆكخانەیا هەولێرێ یا نێڤدەولەتی هاتنە دەستپێكرن».
پشتی شەڕێ د ناڤبەرا ئیرانێ و ئیسرائیلێدا دەستپێمری، گەشتێن ئەسمانی یێن فرۆكخانەیا هەولێرێ یا نێڤدەولەتی و فرۆكخانەیێن دی یێن ئیراقێ، هاتبوونە راگرتن.
ل رۆژا دوشەمبی 23/6/2025، دیلان رەشاد، پەیڤدارێ وەزارەتا ڤەگوهاستن و گەهاندنێ ل حوكمەتا هەرێما كوردستانێ راگەهاندبوو» پشتی دائێخستنا ئەسمانێ ئیراقێ د دەمێ 10 رۆژاندا هزار و 283 گەشتێن ئەسمانی ل هەردو فرۆكخانەیێن هەولێرێ و سلێمانیێ یێن نێڤدەولەتی هاتبوو هەلوەشاندن».
پەیڤدارێ وەزارەتا ڤەگوهاستن و گەهاندنێ ل حوكمەتا هەرێما كوردستانێ ئاماژە ب وێ چەندێ ژی كربوو» ل فرۆكخانەیا هەولێرێ یا نێڤدەولەتی هزار و 184 گەشتێن ئەسمانی هاتبوونە هەلوەشاندن و ل فرۆكخانەیا سلێمانیێ ژی 99 گەشتێن ئەسمانی هاتبوونە هەلوەشاندن».
