بکارئینانا ماددەیێن بێهۆشکەر خێزان هەڕفاندینە
قائید میرۆ:
ئه‌ندامه‌كێ لیژنا به‌رهنگاربوونا ماددێن بێهۆشکەر ددیدارەکێ دا بۆ ڕۆژنامەیا ئەڤرۆ دیار کر کو بزاڤێن باش بۆ به‌رهنگاربوونا ماددێن بێهۆشکەر دهێنه‌كرن و گۆت؛ سه‌رۆكێ حوكمه‌تێ ژی پشته‌ڤانیا لایه‌نێن په‌یوه‌ندیدار دكه‌ت بۆ به‌رهنگاربوونا ماددێن بێهۆشکەر.
دكتۆر سه‌لاح ئه‌نوه‌ر، ئه‌ندامێ لیژنا به‌رهنگاربوونا ماددێن بێهۆشکەر دیار كر، لگوره‌ی ئامارێن به‌رده‌ست بكارئینان و بازرگانیكرن ب ماددێن بێهۆشکەر زێده‌بوویه ل هه‌رێما كوردستانێ و مه‌ترسی لسه‌ر جڤاكی په‌یداكریه و گۆت: به‌لێ دگه‌ل ئه‌ڤێ زێده‌بوونێ ژی ریكارێن توند هه‌نه دژی وان كه‌سێن بازرگانیێ ب ماددێن هۆشبه‌ر دكه‌ن یانژی بكار دئینن.
د. سەلاح گۆتژی: ده‌زگه‌هێن ئه‌منی به‌رده‌وام چاڤدێریا ره‌وشێ دكه‌ن و سالانه چه‌ندین كه‌س ب تۆمه‌تا بكارئینان و بازرگانیکرنێ ب ماددێن بێهۆشکەر دهێنه ده‌سته‌سه‌ركرن و راده‌ستی دادگه‌هێ دهێنه‌كرن.
د. سەلاح ئەنوەر د بەردەوامیا ئاخفتنێن خۆدا دیار کر کو مه‌سرور بارزانی وه‌كی سه‌رۆكێ حوكمه‌تا هه‌رێما كوردستانێ ب هه‌موو شیانێن خۆ پشته‌ڤانیا ده‌زگه‌هێن په‌یوه‌ندیدار دكه‌ت بۆ به‌رهنگاربوونا ماددێن بێهۆشکەر، هەروەسا سه‌رۆك بارزانی ژی چه‌ندین جاران ته‌كه‌زی لسه‌ر مه‌ترسیا ماددێن بێهۆشکەر كریه و گۆت: پشته‌ڤانیا سه‌رۆك بارزانی و سه‌رۆكێ حوكمه‌تا هه‌رێما كوردستانێ زۆر یا گرنگه بۆ نه‌هێلانا ماددێن بێهۆشکەر، چونكه ماددێن بێهۆشکەر مه‌ترسیه‌كا زۆر لسه‌ر جڤاكی هه‌یه و چه‌ندین خێزان هاتینه هەرفاندن ژ ئه‌گه‌رێ بكارئینانا ماددێن بێهۆشکەر، زیانێن ماددێن بێهۆشکەر ژلایێ ئابوری و جڤاكی گه‌له‌ك زۆرن و دڤێت وه‌لاتی د هشیاربن.
ئه‌ندامێ لیژنا به‌رهنگاربوونا ماددێن بێهۆشکەر دازانین، پشتی قانوونا به‌رهنگاربوونا ماددێن بێهۆشکەر هاتیه راستڤه‌كرن حوكمه‌تێ رێكارێن توند ئه‌نجامداینه دژی وان كه‌سان یێن بازرگانیێ ب ماددێن بێهۆشکەر دكه‌ن و رێكارێن تایبه‌ت ژی هه‌نه بۆ كه‌سێن تووشی بكارئینانێ بووین، ئانکو سزایێ وان كه‌سان یێن بازرگانیێ ب ماددێن بێهۆشکەر دكه‌ن توند بوویه و رێكارێن چاره‌سه‌ركرنێ ژی هه‌نه بۆ كه‌سێن بۆینە قوربانی و تووشی بكارئینانا ماددێن بێهۆشکەر بووین و گۆت: بڕیاره دو سه‌نته‌رێن چاره‌سه‌ریێ بۆ وان کەسێن ماددێن بێهۆشکەر بکادئینن بهێنه ڤه‌كرن داکو ده‌ستان ژ بكارئینانا ماددێن بێهۆشکەر به‌رده‌ن.
ل گوره‌ی دووڤچوونا رۆژناما ئه‌ڤرۆ لسه‌رانسه‌ری هه‌رێما كوردستانێ پشكا شێری یا زیندانیێن ناڤا چاكسازیێن هه‌رێما كوردستانێ ب تۆمه‌تا ماددێن بێهۆشکەر هاتینه حوكمکرن و دده‌مێ نوكه‌دا زێده‌تری هزار و 500 كه‌سان ب تاوانا بكارئینان و بازرگانیێ ب ماددێن هۆشبه‌ر هاتینه حوکمکرن.
