ئیران: سەبارەت ب دانوستاندنێن ل گەل ئەمریکا مە چو بڕیار نەداینە
عەباس ئیراقچی وەزیرێ دەرڤە یێ ئیرانێ دیار کر، هەلوەستێ ڤێ دووماهیێ یێ ترامپی سەبارەت ب عەلی خامنەیی ب چو رەنگەکێ ناهێتە قەبوول کرن و هەکە ئەمریکا دڤێت ل گەل ئیرانێ دانوستاندنان بکەت دڤێت بەری هەر تشتەکێ بەرپرسێن ئەمریکا رێزێ ل ئیرانێ بگرن و سەبارەت ب دانوستاندنێن ل گەل ئەمریکا ژی هەتا نها ئیرانێ چو بریارەک نەدایە.
ئەو یەک د دەمەکێ دایە کو پشتی رێبەرێ ئیرانێ عەلی خامنەیی د داخویانیەکێ دا دیار کربوو وان شیا دربێن مەزن ل ئسرائیلی و ئەمریکا بدەن و ئیران سەرکەفت و ل هەمبەر دا دۆنالد ترامپ سەرۆکێ ئەمریکا ژی دیار کر، وی نەهێلایە ئسرائیل عەلی خامنەیی بکوژیت و ژ بەر ڤێ یەکێ ژی دڤێت بەری هەر تشتەکێ خامنەیی و بەرپرسێن ئیرانێ سوپاسیا وی بکەن و د رەوشا نها دا ئەمریکا سزایێن ل سەر ئیرانێ ژی کێم ناکەت.
