دەم پارتی داخوازەکێ ژ سەرۆکێ پەرلەمانێ تورکیا دکەت
هەڤسەرۆکێ دەم پارتی راگەهاند دڤێت پرۆسیسا رادەستکرنا چەکان زوو برێڤە بچیت و ژ بۆ ڤێ یەکێ ژی گرنگە پەرلەمانێ تورکیا ب ئەرکێ خوە رابیت و د زووترین دەم دا لیژنەیەک بهێتە ئاڤاکرن و سەرۆک کۆمارێ تورکیا ژی راگەهاند ئەو دی ل گەل دەم پارتی کۆمبیت.
تونجەر باکرهان هەڤسەرۆکێ دەم پارتی پشتی هەڤدیتنا شاندێ ئیمرالیێ ل گەل سەرۆکێ پەرلەمانێ تورکیا دیار کر، وەکو دەم پارتی وان ژی دڤێت پرۆسیسا رادەستکرنا چەکان زوو برێڤە بچیت، ژ بۆ ڤێ یەکێ ژی دڤێت لیژنەیەکا بلند ژ هەموو هێزێن سیاسی ل پەرلەمانێ تورکیا بهێتە ئاڤاکرن و گۆت: (مە وەکو دەم پارتی بەری نها ژی دیار کریە دڤێت پەرلەمانێ تورکیا چاڤدێریا قووناغا ئاشتیێ بکەت، بێگومان چەک د دەستێ پەکەکێ دانە و بەرپرسێن پەکەکێ ژی دبێژن دڤێت ژ ئالیێ دەولەتێ ڤە هندەک تشت بهێنە کرن دا ئەو ژی دەست ژ چەکی بەردەن و چەکێن خوە رادەست بکەن، ژ بەر ڤێ یەکێ ژی گرنگە پەرلەمانێ تورکیا د زووترین دەم دا لیژنەیا بلند ئاڤا بکەت دا لیژنە چاڤدێریا پرۆسیسا رادەستکرنا چەکان بکەت).
ل ئالیێ دی نومان کورتولمیش سەرۆکێ پەرلەمانێ تورکیا ژی دیار کر، کۆمبوونا وان ل گەل شاندێ ئیمرالیێ گەلەک باش بوویە و وەکو پەرلەمان ئەو دێ بەری بێهنڤەدانێ لیژنەیەکێ ژ هەموو هێزێن سیاسی ئاڤا کەن دا ئەو لیژنە چاڤدێریا قووناغا ئاشتیێ بکەت، چونکی قووناغا ئاشتیێ گەلەک یا گرنگە، هەموو پارتێن سیاسی ل تورکیا پشتەڤانیێ ل قووناغا ئاشتیێ دکەن و هەتا نها ژی ب رەنگەکێ باش برێڤە دچیت، گرنگە پەکەکە د زووترین دەم دا چەکێن خوە رادەست بکەت دا چو مەترسی ل سەر قووناغا ئاشتیێ نەمینن، بێگومان پشتی رادەستکرنا چەکان ژی دێ گەلەک چاکسازیێن قانوونی و سیاسی ل تورکیا هێنە کرن.
سەبارەت ب قووناغا ئاشتیێ بەری دو رۆژان رەجەب تەیب ئەردۆغانێ سەرۆک کۆمارێ تورکیا ژی دیار کر، ژ بۆ وان گەلەک گرنگە کو شەر و توندوتیژی د رۆژەڤا تورکیا دا نەمینیت، ئارمانجا وان ئاڤاکرنا تورکیایەک بێ تیرۆرە و هەتا نها ژی وان شیاینە کارێن گەلەک باش بکەن و گۆت: (د چەند رۆژێن بهێت دا ئەز دێ ل گەل شاندێ ئیمرالیێ کۆمبم و دێ سەبارەت ب قووناغا ئاشتیێ و چاوانیا رادەستکرنا چەکان و گەلەک تشتێن دی دانوستاندنان کەم، ژ بۆ مە وەکو تورکیا گەلەک گرنگە ئێدی تیرۆر نەمینیت و هەموو وەلاتیێن تورکیا د ناڤ ئاشتی و ئارامیێ دا بژین).
چاڤدێرێن سیاسی ژی دیار دکەن، دڤێت ل گەل رادەستکرنا چەکان ل تورکیا گوهۆڕینێن قانوونی بهێنە کرن و وەکو پێنگاڤا ئێکێ دڤێت هەبوونا کوردان ل تورکیا ب فەرمی بهێتە قەبوول کرن و هەموو ئاستەنگیێن ل هەمبەر پەروەردا ب زمانێ کوردی نەمینن و زمانێ کوردی ژی وەکو زمانێ تورکی ببیتە زمانێ فەرمی یێ پەروەردێ.
