خڕڤەبوونەك ل دۆر مەترسیێن ماددەیێن هۆشبەر ل شێلادزێ هاتە ئەنجامدان
ئامێدیێ، مەحمود نهێلی:
ژ بۆ هشیاركرنا وەلاتیان ژ مەترسیا ماددەیێن هۆشبەر و خوە دووركرن ژێ، كۆمەكا گەنجێن دەڤەرا ئامێدیێ، كو ژ ئەندامێن ئێكەتیا قوتابی و لاوێن دیموكراتا كوردستانێ پێكهاتبوون د ناڤ بازارێ شێلادزێ دا خرڤەبوون و یاداشتەك پێشكێشكر و د دووڤ دا هەژمارەكا نامیلەكەیان، كو ژ رێنمایێن خوەپارێزیێ پێكهاتبوون، ل سەر گەنجێن وێ دەڤەرێ بەلاڤكرن.
نوونەرێ وان گەنجان بۆ ئەڤرۆ دیار كر، پشتی جەنابێ سەرۆك بارزانی د كۆنگرەیێ ئێكگرتنێ یێ ئێكەتیا قوتابی و لاوان دا، ئاماژە ب مەترسیا ماددەیێن هۆشبەر كری، سكرتاریەتا ئێكەتیا قوتابی و لاوان ب فەر دیت وان راسپاردەیان بكەتە بەرنامەیێ كاری و ل سەر كار بكەت و گۆت: «ئەم وەكو قوتابی و لاوێن دەڤەرا ئامێدیێ رابووینە ب چاپكرن و بەلاڤكرنا نامیلكەیەكێ، كو ژ رێنمایێن خوەپاراستنێ ژ ماددەیێن هۆشبەر پێكهاتیە، هەروەسا مە ب فەردیت ئەم د ناڤ بازارێ شێلادزێ دا كۆم ببین و ڤێ یاداشتنامێ پێشكێش بكەین».
گۆتژی: «ئەم دێ ڤان نامیلەكەیان ل سەنتەرێ ناوچەدارییا دێرەلۆكێ و شێلادزێ بەلاڤكەین، ئامارێن دەڤەرا ئامێدیێ ژ دەڤەرێن دیترێن كوردستانێ باشترن، لێ ئەم دخوازین، خوە ل ڤی مادەی بدەنە پاش و دایباب هشیاری زارۆیێن خوە بن».
