10 لایەنێن سیاسی ل پارێزگەها دهۆكێ دێ پشكداریێ د هەلبژارتنێن بهێن دا كەن
زنار تۆڤی:
خالد عەباس، بەرپرسێ ئۆفیسا دهۆكێ یێ كومسیۆنا بلندا هەلبژارتنێن ئیراقێ بۆ رۆژناما ئەڤرۆ دیار كر، هەتا ناڤێن بەربژاران ب ئێكجاری نەهێنە ئێكلاكرن، نابیت چو لایەنەكێ سیاسی بانگەشێ بكەت و دبێژیت: بازنێ گرێدایی پارێزگەها دهۆكێ، 11 كورسی هەنە، كو ئەو ژی هەشت زەلام و سێ ژنن و كورسیەكا كۆتا بۆ مەسیحیان هاتییە دیاركرن، هەروەسا دبیت گوهۆڕین د لیستا بەربژاران دا بهێتە كرن، نوكە ناڤێن هەموو بەربژاران د قووناغا پشكنینێ و هووربینیێ دانە، هەتا ناڤ نەهێنە پەسەند كرن، نابیت چو بەربژارەك بانگەشێ بكەت، هەر كەسێ سەرپێچیێ بكەت، ل دووڤ رێنمایێن كومسیۆنا بلند دێ سەرەدەری ل گەل هێتە كرن.
ناڤهاتی گۆت: «ل پارێزگەها دهۆكێ 10 لایەنێن سیاسی بۆ هەلبژارتنێن بهێن یێن پەرلەمانێ ئیراقێ خۆ بەربژاركرینە، سەرجەمێ بەربژارێن پشكدار ژی ل پارێزگەها دهۆكێ 61 بەربژارن، ژ وان ژی 40 زەلام و 21 ژنن، هەروەسا بۆ كورسیا كۆتا یا مەسیحیان ژی پێنج كەسان خۆ بەربژار كریە، ئەو ژی سێ زەلام و دو ژنن، دیسا دو بەربژارێن سەربەخۆ ژی هەنە».
خالد هێشتا گۆت: «پێدڤییە هەموو بەربژار پابەندی رێنمایێن كومسیۆنێ بن، هەروەسا بۆ رۆژێن دەنگدانا تایبەت و گشتی ل پارێزگەها دهۆكێ، وەكو كومسیۆنا بلندا هەلبژارتنان، مە پێدڤی ب 10 هزار فەرمانبەران هەیە بۆ سەر سندۆقێن دەنگدانێ».
بڕیارە ل 11/11/2025 ێ، هەلبژارتنێن پەرلەمانێ ئیراقێ بهێنە كرن، هەروەسا تۆمارا بایۆمەتری ل 20/6 ب دوماهی هاتییە و ژ سەرجەمێ 944 هزار دەنگدەران، 83% ێ، یا دەنگدەرێن دهۆكێ ل دووڤ سیستەمێ بایۆمەتری هاتینە تۆماركرن و ئەڤە رێژەكا بلندە.
