ئێكەتیا قوتابی و لاوان هەوەكا بەرفرەهـ یا خۆپارێزیێ ژ ماددەیێن هۆشبەر دەستپێكر
رەمەزان زەكەریا:
سكرتێرێ ئێكەتیا قوتابی و لاوێن دیموكراتا كوردستانێ ئاشكرا كر، ل سەر ئاستێ هەرێما كوردستانێ هەوا خۆپارێزیێ ژ ب كارئینانا ماددەیێن هۆشبەر دەستپێكر و ب هزاران ئاگەهداری و رێنمایێن خۆپارێزیێ، ب رێكا 550 كادرێن قوتابی و لاوان ل سەر خەلكێ هەرێما كوردستانێ هاتینە بەلاڤكرن.
شڤان مەحموود، سكرتێرێ ئێكەتیا قوتابی و لاوێن دیموكراتا كوردستانێ بۆ ئەڤرۆ گۆت: «مە وەكو ئێكەتیا قوتابی و لاوێن دیموكراتا كوردستانێ هەوا خۆپارێزیێ ژ ماددەیێن هۆشبەر ل سەر ئاستێ كوردستانێ ژ زاخۆ هەتا خانەقینێ دەستپێكریە، ئەڤ هەوە ل 60 لق و نڤیسینگەهـ و ناڤەندێن لاوان و قوتابیان دهێتە ئەنجامدان، نێزیكی 550 كادر ئەڤێ هەوێ ب رێڤە دبەن».
ناڤبری گۆتژی: «د ڤێ قووناغێ دا هشیاری و خۆپاراستن و ساخلەمی و زیانێن ماددەیێن هۆشبەر و زیانێن وێ بۆ ئاسایشا نیشتیمانی و كیانێ هەرێما كوردستانێ و خۆپارێزیێ بەلاڤ دكەین و د قووناغا داهاتی دا دێ كارێن دی ئەنجام دەین».
