ئیرانێ ٣٠٠ وەلاتیێن کورد دەستەسەر کرینە
رێکخستنا مافێن مرۆڤی یا رۆژهەلاتێ کوردستانێ د داخویانیەکێ دا راگەهاند، پشتی شەڕێ ئیرانێ و ئسرائیلێ هەتا نها ئیرانێ ٣٠٠ وەلاتیێن کورد ب تومەتێن جودا جودا دەستەسەر کرینە و هەوا دەستەسەرکرنا کوردان هەتا نها ژی بەردەوام دکەت.
رێکخستنا هەنگاو ئەو یەک ژی دیار کریە، ب تومەتا بەلاڤکرنا دەنگوباسێن شاش و بەلاڤکرنا زانیاریان و پشتەڤانی ل ئێرشێن ئسرائیلێ رۆژانە وەلاتیێن کورد ل ئیرانێ دهێنە دەستەسەرکرن و ئەو یەک بوویە جهێ ترسەکا مەزن ل دەف چالاکڤانێن کورد ل رۆژهەلاتێ کوردستانێ، چونکی سازیێن دەولەتێ بێی کو چو بەلگەیەک د دەستێ وان دا هەبیت کوردان دەستەسەر دکەن.
ریکخستنا مافێن مرۆڤی یا رۆژهەلاتێ کوردستانێ ئەو یەک ژی دیار کریە، رێژەیا هەری زێدە یا دەستەسەرکرن و سێدارەدانێ ل رۆژهەلاتێ کوردستانێ یە، ئانکو ئیران سالانە هەری زێدە کوردان دەستەسەر دکەت و ل سێدارە ددەت و مخابن جیهان ل هەمبەر زۆرداریا ئیرانێ یا ل هەمبەر کوردان بێدەنگە.
