ترامپ: من نەڤێت ل گەل ئیرانێ بئاخڤم
دۆنالد ترامپ سەرۆکێ ئەمریکا د داخویانیەکێ دا دیار کر، وان شیاینە هەموو بنگەهێن ئەتۆمی یێن ئیرانێ ژناڤ ببەن، نها چو کارتێن وەسا بهێز د دەستێ ئیرانێ دا نەماینە کو ل دژی بەرژەوەندیێن ئەمریکا بکار بینیت، ئیرانێ دەلیڤە هەبوو ب رێیا دانوستاندنان و ئاشتیێ گەلەک تشتان بدەستڤە بینیت، لێ وان ئەو یەک نەکر و نها ژی ئیران گەلەک لاواز بوویە.
سەرۆکێ ئەمریکا ئەو یەک ژی دیار کر، وی نەڤێت ل گەل ئیرانێ چو دانوستاندنان بکەت و ئەو وەکو سەردەمێ ئۆباما ناکەت و پاران نادەتە ئیرانێ، چونکی وی دەمی ئۆباما شاشیەک مەزن کر و چەندین ملیار دۆلار پارە دانە ئیرانێ، لێ ئەو کارەک وەسا ناکەت و چو نادەتە ئیرانێ و بەرهەڤ نینە ل گەل بەرپرسێن ئیرانێ بئاخڤیت ژی.
ل ئالیێ دی مەجید تەخت رەوانچی جێگرێ وەزیرێ دەرڤە یێ ئیرانێ ژی دیار کر، نها رەوش بۆ دانوستاندنێن ل گەل ئەمریکا یا گونجای نینە و باوەریا ئیرانێ ژی ب ئەمریکا و ترامپی ناهێت.
