دێ لیژنەیەکێ بۆ دووڤچوونا قووناغا ئاشتیێ پێک ئینین
سەرۆکێ پەرلەمانێ تورکیا دیار دکەت وان دەست ب پێکئینانا لیژنەیەکێ ل پەرلەمانێ تورکیا کرینە دا دووڤچوونا قووناغا ئاشتیێ بکەت و وەکو پەرلەمان ئەو دێ یا پێدڤی کەن دا شەڕێ ل تورکیا ب دووماهی بهێت، چونکی پێدڤیا تورکیا ب ئاشتیێ و پێکڤەژیانێ هەیە.
نومان کورتولمیش سەرۆکێ پەرلەمانێ تورکیا د داخویانیەکێ دا دیار کر، وی بەری چەند رۆژان کۆمبوونەکا گەلەک باش ل گەل دەم پارتی و پارتێن دی یێن ل پەرلەمانێ تورکیا ئەنجام داینە و جهی دلخوەشیێ یە کو هەموو پارتێن ل پەرلەمانێ تورکیا پشتەڤانیێ ل قووناغا ئاشتیێ دکەن و گۆت: (مە دڤێت ل په‌رله‌مانێ تورکیا پرسێن مه‌زن یێن تورکیا چارەسەر بکەین، چونکی نها پتر ژ هەر دەمەکێ پێدڤیا مە ب ئاشتیێ و پێکڤەژیانێ هەیە، هەموو وەلاتیێن تورکیا ئێدی ژ شەڕی و ئالۆزیان بێزار بووینە و خەلکی ژیانەک خوەش و ئارام دڤێت، ئەو یەک مافێ هەموو وەلاتیێن تورکیا یە، بەری نها ژی مە دیار کربوو وەکو پەرلەمانێ تورکیا ژ بۆ پێشڤەبرنا قووناغا ئاشتیێ یا پێدڤی دێ کەین و نها ژی ئەم یێ کار ل سەر پێکئینانا لیژنەیەکێ بۆ دووڤچوونا قووناغا ئاشتیێ ل تورکیا دکەین).
سه‌رۆکێ په‌رله‌مانێ تورکیا هه‌روه‌سا راگه‌هاند ژی کو په‌رله‌مانێ تورکیا ناڤه‌ندا چارەسەرکرنا هه‌موو پرسێن تورکیایه و گۆت: (د ره‌وشا نها دا مه پێدڤی ب ئاشتیا ناڤخوەیی و یه‌کگرتنه‌کا مه‌زن یا جڤاکی و سیاسی هه‌یه و هه‌تا نها پێنگاڤێن مه‌زن هاتینه ئاڤێتن و ئه‌ز دبینم هه‌م جڤاکێ مه و هەم ژی سیاسه‌تا تورکیا بۆ چارەسەرکرنا پرسێن مه‌زن یێن تورکیا ئامادەنە و ئەو یەک ژی نیشا ددەت، کو تورکیا وەلاتەک بهێزە و دشێت هەموو پرسێن خوە چارەسەر بکەت، مە دڤێت پەرلەمانێ تورکیا ب رۆلێ خوە رابیت و یا پێدڤی بکەت، چونکی پەرلەمانێ تورکیا نوونەراتیا هەموو وەلاتیێن تورکیا دکەت و ژ بەر ڤێ یەکێ ژی وەلاتیێن تورکیا چاڤەرێ نە پەرلەمان یا پێدڤی بۆ ئاشتیێ و چارەسەریێ بکەت).
سەرۆکێ پەرلەمانێ تورکیا د دووماهیا ئاخڤتنا خوە دا ئەو یەک ژی دیار، کو سەرۆک کۆمارێ تورکیا دەست ب بزاڤەکا گەلەک مەزن بۆ ئاشتیێ کریە و ئەردۆغانی دڤێت ئێدی شەڕ و ئالۆزی د رۆژەڤا تورکیا دا نەمینیت، ژ بۆ ڤێ یەکێ وەکو پەرلەمانێ تورکیا ئەم سوپاسیا هەلوەستێ دەم پارتی ژی دکەین، براستی ژی نها دەم پارتی رۆلەک گەلەک باش و ئەرێنی ژ بۆ ئاشتیێ و پێکڤەژیانێ دگێریت و گۆت: (ب چارەسەرکرنا پرسێن هەی دێ تورکیا بهێزتر لێ هێت و دێ وی دەمی رەوشا ئابووری یا وەلاتیان ژی گەلەک باش بیت، مە ژی دڤێت ئەم یا پێدڤی بۆ ئاشتیێ و بهێزکرنا تورکیا ئەنجام بدەین).
