مـە دەست ب قـووناغـەکـا نوو کـریە و نەشێین پاشڤە ڤـەگـەڕین
سەرۆکێ پارتا بزاڤا نەتەوەپەرست یا تورکیا راگەهاند کو دڤێت ئاشتی د رۆژەڤا هەموو تورکیا دابیت، وەکو تورکیا وان دەست ب قووناغەکا نوو یا ئاشتیێ و پێکڤەژیانێ کرینە و ئێدی نەشێن پاشڤە ڤەگەرن و دڤێت پەرلەمانێ تورکیا ژی یا پێدڤی بکەت.
دەولەت باخچەلی سەرۆکێ پارتا بزاڤا نەتەوەپەرست یا تورکیا دوهی د کۆمبوونا پارتا خوە ل پەرلەمانێ تورکیا دا ئاخڤی و دیار کر، وان دەست ب قووناغەکا دیرۆکی ل تورکیا کرینە، پێدڤیا تورکیا ب ئاشتیێ و پێکڤەژیانێ هەیە، قووناغا نها گەلەک گرنگە و دڤێت هەموو هێز و ئالیێن سیاسی ل تورکیا ژ بۆ ئاشتیێ کار بکەن، دڤێت ئاشتی د رۆژەڤا تورکیا دا بیت و گۆت: (نابیت هندەک کەس و ئالیێن سیاسی ب داخویانیێن توند ببنە ئەگەرێ ئاریشەیێن نوو، رەوشا نها گەلەک هەستیارە و دڤێت هەر کەس هەست ب بەرپرسیاریا خوە یا دیرۆکی بکەت، ئێدی دەمێ هندێ نینە ئەم بەحسێ ئالۆزیێن بەری نها بکەین، تورکیا نەشێت جارەکا دی ببیتە مەیدانا ئالۆزیان و دڤێت شەڕێ نها بۆ هەتا هەتای ب دووماهی بهێت، وەکو تورکیا مە کارێن گەلەک باش کرینە و دڤێت قووناغا نها بگەهیتە وێ ئەنجاما کو مە هەموویان دڤێت).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، دڤێت پرۆسیسا رادەستکرنا چەکان ژ ئالیێ پەکەکێ ڤە زوو ب دووماهی بهێت و ل هەمبەر دا گرنگە پەرلەمانێ تورکیا ژی دەست ب کارێن خوە بکەت، دڤێت لیژنە زوو بهێت پێکئینان و دەست ب کارێن خوە بکەت، گەلەک گرنگە چاکسازیێن سیاسی و قانوونی بهێنە کرن، دڤێت ئەم رێ نەدەین هندەک هێز و ئالی ل دەرڤەیی تورکیا ئالۆزیان بۆ پێشڤەبرنا قووناغا ئاشتیێ دروست بکەن و گۆت: (هەتا نها مە شیایە کارێن گەلەک باش بکەین، قووناغا ئاشتیێ ب رەنگەکێ باش برێڤە دچیت، لێ مەترسی ژی هەنە و ژ بەر ڤێ یەکێ ژی دڤێت بلەز لیژنەیەک ل پەرلەمانێ تورکیا بهێتە ئاڤاکرن و دووڤچوونا قووناغا ئاشتیێ بکەت، هەکە ئەو یەک نەهێتە کرن دبیت ئاستەنگی دروست ببن، گرنگە ل پەرلەمانی دەست ب چاکسازیێن قانوونی و سیاسی بهێتە کرن).
ل گۆر زانیاریێن دەستێ رۆژنامەیا ئەڤرۆکە کەفتینە دبیت هەتا ٧ رۆژێن دی گرۆپەک ژ چەکدارێن پەکەکێ ل بەر چاڤێ دەزگەهێن راگەهاندنێ چەکێ خوە دانێن و وەکو نیەت پاکی چاڤەرێی پێنگاڤێن تورکیا بن.
چاڤدێرێن سیاسی ل تورکیا ژی وەسا دبینن، هەتا نها چو پێنگاڤێن بەرچاڤ ژ ئالیێ دەولەتا تورکیا ڤە نەهاتینە ئاڤێتن و گرنگە د پێنگاڤا ئێکێ دا دەولەتا تورکیا هەموو گرتیێن سیاسی ئازاد بکەت و دووماهیێ ب سیاسەتا قەیوومان بینیت.
