دهۆك دێ كاروانێ خوە ب دووماهی ئینیت
قەیس وەیس:
چاڤەڕێ دهێتە كرن ئەڤرۆ چار یاری و سوبەهی دو یاریێن دی ژ هەڤڕكیێن گەڕا 38ێ و دووماهییا وەرزێ 2024-2025ێ یا خولا ستێرێن ئیراقێ یا فوتبۆلێ بهێتە كرن، هەر دو یانەیێن كوردستانی دهۆك و هەولێر دێ دوورێ یاریگەهـ و جەماوەرێن خوە ل ناڤەڕاست و باشۆرێ ئیراقێ كەن و نەورۆز دناڤ ئەردێ خوە دا دێ كاروانێ خوە د وەرزێ ئەڤ سالە دا ب دووماهی ئینن.
دهۆك دێ شێت دووماهییەكا سەركەڤتی ئینت؟
بڕیارە ئەڤرۆ ل دەمژمێر حەفتی شەڤ تیما یانەیا دهۆك ببیتە مێڤانا یانەیا ئەلكەرخ یا بەغدایی ئەوا دێ ل یاریگەها وێ هێتە كرن، ئەلهۆیێن چیا د دەمەكێ هەستیار دا دەرباز دكەت ئەوا 54 خال كۆمكرین ژ 15 سەركەڤتن، نەهـ وەكهەڤی و 13 خوسارەتیان، د نەهـ یاریێن بۆری لدووڤ ئێك نە شیایە چو سەركەڤتنان بینت، ژلایێ خوەڤە تیما كەرخێ 46 خال هەنە ڕێزا 14ێ دهێت، هەرچەندە ئەنجامێ ڤێ یاریێ چو كارتیكرنێ ل سەر هەردو یانەیان ناكەت، لێ بۆ تیما دهۆكێ گەلەك یا گرنگە پێخەمەت ڤەگەڕاندنا ئاست و هێزا تیمێ بەری ڤەگەڕیتە دناڤ هەڤڕكیێن كۆپا ئیراقێ دا ئەوا بڕیارە ل دووماهییا حەفتییا بهێت بهێتە كرن.
بۆ ڤێ یاریێ چەند یاریزان ناكەن!
ژبەر هەبوونا كارتێن سۆر هەردو ستێرێن یانەیا دهۆك هارۆن ئەحمەد و پیشەكارێ وێ یێ كوتیڤۆاری یانیك زاكێری، دگەل دا هەر ئێك ژ پیشەكاران، لۆكاس هێنریك تۆرێن، مۆسێس لۆكاس، مارلۆن دو سانتۆس، دیسان ژبەر هنگاڤتنێ، محەمەد سەعید و زانا عەلی.
ئەرێ سلێمان رەمەزان دێ د تاقیكرنا خوە یا ئێكێ دا ب سەركەڤیت؟
یارییا ئەڤرۆ یا تیما دهۆكێ بەرانبەر یانەیا ئەلكەرخ دبیتە یارییا ئێكێ بۆ ڕاهێنەرێ خودان سەربۆری و كوڕێ باژێرێ دهۆكێ سلێمان رەمەزانی ئەوێ ل وەرزێ بۆری ژی دەستپێكا خولێ تیم بڕێڤەبربوو دیسان ل وەرزێ 2021-2022 شیابوو تیما دهۆكێ ژ پلا ئێك ب گەهینە پلا ستێرێن ئیراقێ، ڕاهێنەرێ ناڤهاتی خودان باوەرنامەیا پرۆیە و چەندین دەستكەڤتێن كوردستانی دگەل یانەیێن زێرەڤانی، زاخۆ و دهۆكێ هەنە، بوویە ڕاهێنەرێ هەوارهاتنێ بۆ تیما دهۆكێ، ئەركێ وی ب سانەهی نابیت ئەوێ دێ سەرپەرشتییا تیما خوە د كۆپا ئیراقێ دا كەت كو بڕیارا یارییا قۆناغا چارێك دووماهیێ ل هەشتێ ڤێ مەهێ تیما مینا مێڤان بكەن.
كی دێ دووماهی گۆل بۆ دهۆكێ تۆماركەت؟
ب شێوەكێ گشتی 11 یاریزانێن دهۆكی ژ سەرجەمێ 40 گۆلان 39 گۆل تۆماركرینە، ئێكەم گۆل د خولێ دا یا پیتەر گۆرگیس بوو ئەوێ هەتا نوكە هەشت گۆل هەنە، دیسان هەر ئێك ژ پاشەنگ عەبدوللا حەفت گۆل، كەریم دەرویش شەش گۆل، ئیبراهیم غازی سێ گۆل، هەروەسان هەرئێك ژ شەرقی ئەلبەحری، مارلۆن دۆ سانتۆس، یانیك زاكێری، لۆكاس هێنریك، سیابەند عەگید دو گۆل، ژلایەكێ دووڤە ئەو یاریزانێن گۆلەك كری ئەو ژی، بەیار ئەبۆ بەكر، كێلبرت كۆمسۆن، مۆسێس لۆكاس، زانا عەلی و عیماد حەسەن، بۆ زانین گۆلەك ب شاشی ڤە یاریزانێ یانەیا مینا ل سەر خوە كرییە، پسیار ئەوە بۆ یارییا ئەڤرۆ كی دێ دووماهی گۆل بۆ دهۆكێ د وەرزێ ئەڤ سالە دا تۆمار كەت؟
پشتەڤانەكێ دهۆكێ: هەرچەندە بێ ئۆمێدن لێ هیڤییا مە كۆپا ئیراقێ یە
ل دۆر ڤێ یاریێ موشیر پاسی ئێك ژ پشتەڤانێن بەردەوام یێن یانەیا دهۆك گۆت: د خۆش و نەخۆشییان دا ئەم بەردەوام پشتەڤانێن یانەیا خوەینە، د نوكە دا تیما مە یا د قۆناغەكا هەستیار دا دەرباز دكەت، یارییا ئەڤرۆ دبیت چو مفایی ژێ نە وەرگرین لێ ژلایێ دەرۆنی ڤە بۆ یاریزانان و ڕاهێنەرێ نوو كاپتن سلێمانی یا باش بیت، هەرچەندە ئەم بێ ئۆمێد بووینە ب دەستڤە ئینانا ڕێزێن باش لێ هیڤییا مە ئەوە ئەڤ یارییە ببیتە دەستپێكەكا بهێز باشترین بەرهەڤی بۆ یارییا كۆپا ئیراقێ.
هەولێر و نەورۆزێ ڕێزبەندیێن باشتر دڤێن
هەر ژ چارچووڤەیێ هەڤڕكیێن گەڕا 38ێ و دووماهییا خولێ بریارە ئەڤرۆ تیما یانەیا نەورۆز دناڤ ئەرد و جەماوەرێ خوە دا ل دەمژمێر حەفتی شەڤ یانەیا كارەبا مێڤان بكەت، تیما باژێرێ سلێمانیێ ل رێزا نەهێ دهێت ب كۆمكرنا 52 خالان و یانەیا كارەبا 48 خال هەنە رێزا 13ێ دهێت.
ژلایێ خوەڤە یانەیا هەولێر سوبەهی ئەینی دێ ل یاریگەها فەیحا ل بەسرا بیتە مێڤانا یانەیا نەفت ئەلبەسرا، یاری دێ ل دەمژمێر حەفتی مەغرەب هێتە كرن، كوڕێن كەلهە و منارە 50 خال هەنە ل ڕێزا 12ێ دهێت، هەردو یانەیێن كوردستانی دێ بزاڤێ كەن.
ژ یاریێن دی یێن مایی ژ خولێ.
یاریێن ئەڤرۆ، نەجەف- تەلەبە ل دەمژمێر 9:30 شەڤ، جەوییە- نەفت میسان، ل دەمژمێر 9:30 شەڤ، سوبەهی ئەینی كەربەلا ل یاریگەها زەورا یانەیا حدود ل دەمژمێر حەفتی مەغرەب مێڤانكەت.
گۆلكەرێ خولێ و ڕێزبەندییا دەهێن ئێكی
ل دووڤ دووماهی لیستەیا هاتییە بەلاڤكرن بەری ب دووماهی هاتنا گەڕا 38ێ هێرشبەرێ یانەیا شورتە موهەنەد عەلی ب تۆماركرنا 27 گۆلان سەرێ لیستێ دهێت و بوویە گۆلكەرێ خولێ یێ وەرزێ ئەڤ سالە، دووڤدا هەر ئێك ژ مەروان حسێن هێرشبەرێ نەورۆز ب17 گۆلان، گۆستاڤۆ هێنریك هێرشبەرێ زاخۆ ب17 گۆلان، رێزێن دویێ و سێیێ دهێن، سەیف رەشید یاریزانێ ئەلقاسم ب15 گۆلان، ئیڤیانی ئێزی هێرشبەرێ كەرخێ ب14 گۆلان، ئەمجەد عتۆان ستێرێ یانەیا زاخۆ ب13 گۆلان، سیمۆن مۆسڤا پیشەكارێ تەلەبە ب12 گۆلان، هێرشبەرێ ئەلقاسم ئەلحارس حاتم ب12 گۆلان، پیشەكارێ شورتە مەحموود ئەلمۆاس ب11 گۆلان و هێرشبەرێ مینا عەلا عەبدولزەهرە ب11 گۆلان ل رێزێن چارێ هەتا 10ێ ل دووڤ ئێك دهێن.
ئالوگۆری دناڤبەرا پلا نایاب و ستێران دا دژوار بوویە
هەرچەندە ب فەرمی فدراسیۆنا فوتبۆلا ئیراقێ خۆیاكرییە كو هەر ئێك ژ یانەیێن حدود خودانا 22 خالان ل رێزا 19ێ و كەربەلا خودانا 20 خالان ل ڕێزا 20ێ و دووماهیێ داكەڤتینە پلا نایاب، بڕیارە دو یانەیێن پلا نایاب پێشڤە بهێن ئەوێن چار یانە شەڕی بۆ دو پلێتا دكەین هەر ئێك ژ مووسل، ئەلغراف، جەولان و ئەمانەت بەغدا، ئەوا دێ ئەڤرۆ چارەنڤیسێ وان دیار بیت، ژلایێ خوەڤە یانەیا خودانا ڕێزا سێیێ دێ د خولا ستێرێن ئیراقێ دا یانەیا نەفت ئەلبەسرا دێ د دو یاریێن پاشكۆ و ب دەستڤە ئینانا پلێتا سێیێ یا ستێرێن ئیراقێ دێ دگەل تیما خودانا ڕێزا سێیێ یا خولا نایاب.
كەنگی دێ وەرزێ نوو دەستپێكەت؟
فدراسیۆنا فوتبۆلا ئیراقێ ڕاگەهاند پشتی ب دووماهی هاتنا وەرزێ 2024-2025ێ یا خولا ستێرێن ئیراقێ و كۆپا ئیراقێ دێ دەست ب گەنگەشێ كەن ژبۆ چاوانییا بڕێڤەچوونا وەرزێ نوو یا خولێ بۆ 2025- 2026ێ ئەوا بڕیارە هەڤڕكیێن وێ ل 13ێ ئەیلۆنا بهێت دەستپێبكەت و بڕیارە ب ئێكی خزیرانا سالا 2026ێ ب دووماهی بهێت و خۆیاركر قارەمانا خولا ستێرێن ئیراقێ و كۆپا ئیراقێ دێ ئێكسەر پشكداریێ د كۆپا ئاسیا ئێك و دو دا كەن خودانا رێزا دویێ یا خولا ستێرێن ئیراقێ دێ پشكداری د قارەمانییا ئەرەبی دا كەت و خودانا ڕێزا سێیێ دێ پشكداریێ د كۆپا كەنداڤی دا كەت.
