ئێکەتیا ئۆرۆپا هۆشداریێ ددەتە ئیرانێ
دوهی سەرۆک کۆمارێ ئیرانێ بریارا پەرلەمانێ وی وەلاتی یا سەبارەت ب راگرتنا هەڤکاریێ ل گەل ئاژانسا جیهانی یا ئەتۆمی ئیمزا کر و ب فەرمی راگەهاند، کو ئێدی ئیران ب چو رەنگەکێ هەڤکاری و هەماهەنگیێ ل گەل ئاژانسا جیهانی یا ئەتۆمی ناکەت و هژمارەک ژ ئەندامێن پەرلەمانێ ئیرانێ ژی دیار کرن، کو دڤێت ئیران بلەز بەردەوامیێ بدەتە پیتاندنا یۆرانیۆمێ و ئێدی نابیت ئیران پێگیریێ ب چو بریارێن ئاژانسا جیهانی یا ئەتۆمی بکەت.
ل ئالیێ دی هژمارەک ژ وەلاتێن ئێکەتیا ئۆرۆپا نەرازیبوونا خوە ل هەمبەر بریارا ئیرانێ دیار کرن و راگەهاندن ئەو یەک دێ بیتە ئەگەرێ ئالۆزیێن گەلەک مەزن و دڤێت ئیران بەردەوام بیت ل گەل ئاژانسا جیهانی یا ئەتۆمی و گرنگە ئیران بلەز ل گەل ئەمریکا ژی دەست ب دانوستاندنان بکەت، چونکی بریارا ئیرانێ ئاستەنگە ل هەمبەر دانوستاندنان و ئەو یەک د بەرژەوەندیا ئیرانێ دا نینە.
هەروەسا دوهی فەرماندارەکێ هێزێن پاسدارێن ئیرانێ ژی دیار کریە، ئەو بەرهەڤیان بۆ داخستنا گەرویێ هورمز دکەن و رێ نادەن پەترۆل دەربازی بازارێن جیهانێ ببیت.
