نوونەرێ ئەمریکا دێ داخوازەکێ ژ مەزلوم عەبدی کەت
مالپەرێ ئەلعەرەبیە د راپۆرتەکێ دا دیار کریە، نوونەرێ تایبەت یێ سەرۆکێ ئەمریکا بۆ کاروبارێن سووریێ دێ ل گەل مەزلوم عەبدی فەرمانداری گشتی یێ هێزێن سووریا دیموکرات کۆمبیت و دێ داخوازا ژێ کەت، کو رێککەفتنا بەری نها یا د ناڤبەرا وی و ئەحمەد شەرعی دا ب تەمامی بهێتە بجهئینان، چونکی مەترسیا بهێزبوونا داعشێ ل سووریێ هەیە و دڤێت رێڤەبەریا خوەسەر و شام ب هەموو رەنگەکێ کار بکەن دا رێ نەدەن جارەکا دی سووریێ ببیتە مەیدانا کریارێن تیرۆرستی یێن داعشێ.
تۆم باراک نوونەرێ سەرۆکێ ئەمریکا بۆ کاروبارێن سووریێ بەری نها ژی دیار کربوو، ئەمریکا دڤێت رەوشا سووریێ یا باش بیت و هەموو پرسێن هەی یێن د ناڤبەرا رێڤەبەریا خوەسەر و شامێ دا ژی ب رێیا دانوستاندنان بهێنە چارەسەرکرن و ژ بەر ڤێ یەکێ ژی ئەمریکا سزایێن ل سەر سووریێ راکرن.
