گرۆپەک ژ چەکدارێن پەکەکێ دێ چەکێن خوە رادەست کەن
دەم پارتی دیار دکەت وان داخواز ژ هندەک دەزگەهێن راگەهاندنێ و سازیێن جڤاکێ سڤیل کرینە کو د رێورەسمێ رادەستکرنا چەکان ل هەرێما کوردستانێ دا پشکدار بن و ئەو یەک ژی بێگومان دەستپێکرنا قووناغەکا دیرۆکی یە و دێ ئەنجامێن خوە یێن گەلەک باش ژی هەبن.
دەم پارتی د داخویانیەکێ دا دیار کریە، شاندەکێ وان دێ ل هەرێما کوردستانێ پشکداریێ د رێورەسمێ رادەستکرنا چەکان دا ژ ئالیێ گرۆپەکێ پەکەکێ ڤە کەت، بریارە د چەند رۆژێن بهێت دا گرۆپەک ژ چەکدارێن پەکەکێ ل هەرێما کوردستانێ چەکێن خوە رادەست بکەن و وەسا دێ قووناغەکا نوو دەستپێکەت، وەکو دەم پارتی وان داخواز ژ هندەک دەزگەهێن راگەهاندنێ و سازیێن جڤاکێ سڤیل کرینە، کو د وێ رێورەسمێ دا پشکدار بن، چونکی ئەو یەک پێنگاڤەکا گرنگ و دیرۆکی یە و دێ ئەنجامێن خوە یێن گەلەک باش ژی هەبن.
دەم پارتی ئەو یەک ژی دیار کریە، گرۆپەک ژ ١٥ هەتا بیست کەسان ژ رۆژنامەڤان و سازیێن جڤاکێ سڤیل ل گەل شاندەکێ دەم پارتی د چەند رۆژێن بهێت دا دێ چنە هەرێما کوردستانێ دا پشکداریێ د رێورەسمێ رادەستکرنا چەکان دا ژ ئالیێ گرۆپەکێ پەکەکێ ڤە بکەن، چونکی گرۆپەک ژ چەکدارێن پەکەکێ وەکو نیەت پاکی بۆ قووناغا ئاشتیێ دێ چەکێن خوە رادەست کەن.
ل ئالیێ دی عەبدولقادر سەلڤی شیرەتکارێ بەرێ یێ سەرۆک وەزیرێن تورکیا ژی دیار کر، پرۆژەیێ تورکیایەک بێ تیرۆر ب رەنگەکێ باش برێڤە دچیت و وەکو دەولەت باخچەلی ژی دیار کر، ئێدی ئەو پاشڤە ڤەناگەرن و دێ شەڕێ چەندین سالان ل تورکیا ب دووماهی هێت و دێ قووناغا ئاشتیێ گەهیتە وێ ئەنجاما کو هەموو وەلاتیێن تورکیا چاڤەرێ نە، گرۆپەک ژ چەکدارێن پەکەکێ، کو دبیت هژمارا وان ٣٠ بن دێ چەکێن خوە رادەست کەن و پاشی دێ دیسان ڤەگەرنە ڤە جهێن خوە، ل هەمبەر دا دهێتە چاڤەرێکرن کو د چارچۆڤەیێ پەرلەمانێ تورکیا دا ژی لیژنەیەک بهێتە ئاڤاکرن و دەست ب کارێن خوە یێن بۆ چاکسازیێن سیاسی و قانوونی بکەت.
چاڤدێرێن سیاسی ل تورکیا و باکورێ کوردستانێ ژی وەسا دبینن، پشتی گرۆپەک ژ چەکدارێن پەکەکێ چەکێن خوە رادەستکرن دێ ئۆجەلان ژی پەیامەکا خوە یا تایبەت بۆ بەردەوامیا قووناغا ئاشتیێ هەبیت و پشتی وێ بێگومان کورد چاڤەرێ نە دەولەتا تورکیا ژی ب کریاری هندەک تشتەک بکەت، ب تایبەتی ژی وەلاتیێن کورد دخوازن گوهۆڕین د دستوورێ تورکیا دا بهێتە کرن و د دستوورێ نوو دا ب فەرمی هەبوونا گەلێ کورد بهێتە قەبوول کرن و زمانێ کوردی ببیتە زمانێ فەرمی ل تورکیا و گرتیێن سیاسی یێن کورد بهێنە ئازاد کرن و سیاسەتا قەیوومان ژی نەمینیت.
