سێ پڕۆژەیێن چاندنێ ب گوژمێ پتر ژ سێ ملیۆن دۆلاران ل سێمێلێ دێ هێنە بجهئینان
سێمێل، موسا خالد:
راگەهاندنا رێڤەبەریا گشتی یا وەبەرهێنانێ ل پارێزگەها دهۆكێ دیار كر كو سێ پڕۆژەیێن نوو یێن چاندنێ ب گوژمێ سێ ملیۆن و 500 هزار دۆلاران ل دەڤەرا سێمێلێ ژ لایێ سێ وەبەرهێنەران ڤە دێ هێنە چێكرن.
ئاشكرا ژی كر، ئەردێ دەڤەرداریا سێمێلێ بۆ چاندنێ یێ گونجایە و بەری نوكە ژی پڕانیا پڕۆژەیێن ژ ڤی جۆری هەر ل وێ دەڤەرێ بووینە، ستراتیژیا كابینەیا نەهێ ئەوە كو ب تایبەتی د وارێ وەبەرهێنانێ دا هەر دەڤەرەكێ ل گوری سروشت و شیانێن وێ مفا ژێ بهێتە وەرگرتن، لەوا مۆلەت بۆ ڤان سێ پڕۆژەیان ژی هاتە دان.
سەبارەت پڕۆژەیان ژی راگەهاندنا رێڤەبەریا گشتی یا وەبەرهێنانێ بەلاڤكریە كو پڕۆژەیێ كاپتن یێ چاندنێ د ناڤ خانیێن شووشەی دا، بۆ زێدەكرنا بەرهەمێ ناڤخۆیی ب گوژمێ ملیۆنەك و 250 هزار دۆلاران دهێتە بجهئینان، پڕۆژەیێ بەدران یێ چاندنێ د ناڤ خانیێن پلاستیكی دا ب گوژمێ ملیۆنەك و 224 هزار و 500 دۆلاران دێ هێتە بجهئینان، دیسا پڕۆژەیێ چاندنا دارێن فستەق و خۆخ و زەیتوونان ب گوژمێ ملیۆنەك و 136 هزار دۆلاران دێ هێتە بجهئینان.
