یانەیێن دهۆك و زاخۆ دێ بزاڤێن دەربازبوونێ ژ ئاستەنگێن جەوییە و شورتە كەن
ل شەڤا سێ شەمبییا بۆری هەردو یانەیێن بەهدینان دهۆك و زاخۆ پێنگاڤەكا باش بەر ب بجهئینانا خەونا خوە یا مەزن ئەوژی ناسناڤێ كۆپا ئیراقێ یە پشتی سەركەڤتن ل سەر مێڤانێن خوە یانەیێن مینا و نەورۆز ئینایی و ژڤانەك بەرانبەر هەدو یانەیێن شورتە و جەوییە دانان د قۆناغا پێش دووماهییا كۆپا ئیراقێ دا ئەوێن ژلایێ خوەڤە سەركەڤتن ل سەر تەلەبە و جەوییە ئینایین، د یاریین واندا ئەوا ژ چارچووڤەیێ قۆناغێن چارێك دووماهییا كۆپایێ هاتینە كرن.
ڕاهێنەرێ خۆمالی ئەلهۆیێن چیا نێزیكی دەستكەڤتەكی كر
د یارییەكا ب مۆرالا بلند و ب بەرهەڤبوونا هژمارەكا ئێكجار مەزن ژ پشتەڤانێن ئەلهۆیێن چیا، تیما یانەیا دهۆكێ سەركەڤتنەكا مەزن ب سەرپەرشتییا ڕاهێنەرێ خوە یێ خۆمالی سلێمان رەمەزانی ل سەر مێڤانا خوە یانەیا مینا یا بەسرایی ئینا ب سێ گۆلان بەرانبەر گۆلەكێ، هەرچەندە تیما مینا هەتا خولەكا 45+1 یا سەركەڤتی بوو، لێ سیابەند عەگید شیا ب شۆتەكا بهێز گۆلا وەكهەڤیێ و ڕاستڤەكرنێ ئینا و نیڤا ئێكێ ب دووماهی هات، د نیڤا دویێ دا گڤاشتنێن تیما دهۆكێ نە ڕاوەستیان ب پلانێن ڕاهێنەری هەتا دادڤانی دو پەنەلتی بۆ ئەلهۆیێن چیا هژمارتین ب سەركەڤتیانە ژلایێ یاریزانێن وێ كەریم دەرۆیش د خولەكا 67ێ و ئیبراهیم غازی د خولەكا 90+6 تۆماركرن، ئەڤێ سەركەڤتنێ تیما دهۆكێ ڤەگۆهاستە یارییا پێش دووماهییا كۆپا ئیراقێ.
كەنگی یارییا دهۆكێ یە و دگەل كێ یە؟
پشتی ب سەركەڤتنا یانەیا جەوییە ل سەر یانەیا نەجەف د هەمان قۆناغ دا ب ئەنجامێ 3-1 گۆلان، بڕیارە ل شەمبییا بهێت دەمژمێر حەفتی مەغرەب یانەیا دهۆكێ یارییا خوە یا قۆناغا پێش دووماهیێ د ناڤ ئەرد و جەماوەرێ خوە دا مێڤاندارییا یانەیا جەوییە بكەت ئەوا دێ یاریگەها یانەیا دهۆك دێ هێتە كرن.
پارێزگارێ دهۆكێ ب هیڤییە دەستكەڤتەكێ دی بینن
ژلایێ خوەڤە د. عەلی تەتەر پارێزگارێ دهۆكێ دەستخوەشییا كارگێرییا یانەیێ، یاریزان و ڕاهێنەری كو دوبارە تیما دهۆكێ ڤەگەڕاندینە سەركەڤتنا پێخوەشحالین پشتی ماوەیەكێ درێژ یا ئەنجامێن لاواز و وەستیانا یاریزانان ئەڤرۆ كەیفخوەش بووینە، یارییا بۆری یا ل بەغدا و یا ئەڤرۆ دگەل مینا هێز و مۆرالەكا دی یا بلند دایە یاریزانان، سۆپاسییەكا بێ پایان بۆ جەماوەرێ مەزن هاتینە دناڤ یاریگەهێ دا هەروەكو هەوە دیتیی جهێ وان ژی نە دكر، بۆ دلخوەشكرنا ڤان پشتەڤانان داخواز ژ هەموو یاریزان كر بۆ یارییا بهێت ژی هەموو شیانێن خوە تەرخانبكەن بۆ دلخوەشكرنا پشتەڤانێن تیمێ، بهیڤینە ئەم دوبارە تام و خوەشییا ناسناڤێ كەنداڤی د ڤێ قارەمانیێ دا نووبكەنەڤە، هەرچەندە یاریینە سەركەڤتن و خوسارەتی هەنە سۆپاس بۆ یاریزانان و تایبەت بۆ جەماوەرێ مەزن یێ بەرهەڤبووی.
سلێمان رەمەزان كەیفخوەش و گەشبینە
ژلایێ خوەڤە سلێمان ڕەمەزان ڕاهێنەرێ تیما دهۆكێ بۆ دەزگەهێن ڕاگەهاندنێ گۆت: دەستپێكێ سۆپاس بۆ خودێ ئەم شیاین ب سەركەڤین، دیسان سۆپاس بۆ جەماوەرێ بەرهەڤبووی، سەركەڤتن بۆ مە ژ هەر تشتەكی گرنگتر بوو پێخەمەت ڤەگەڕیانا تیما دهۆكێ بۆ جهێ خوە یێ ڕاستەقینە، ئەڤ سەركەڤتنە دێ بیتە پالدەرەك بۆ یاریێن داهاتی و بەر ب فینالا كۆپا ئیراقێ بچین، بهیڤی نە یاری بۆ یاری باشتربن و ئەڤە ئەركێ مەیە بگەهینە ئارمانجا خوە، د ڤان هەردو یاریێن بۆریدا مە كار ل سەر بلندكرنا مۆرال و دەرۆنێ یاریزانان كار دكر، دیسان چارەسەركرنا ئەوا شاشیێن یاریزانان و شیاین بكینە هێزا تیمێ، بەرهەڤبوونا جەماوەری ببو یاریزانێ هژمارە ئێك دناڤ یاریگەهێ دا، بهیڤینە بەردەوام دلێ وان خوەشكەین.
ڕێكا زاخۆ بۆ خەونا مەزن نێزك بوو
ژلایێ خوەڤە تیما یانەیا زاخۆ ژی دەربازبوو قۆناغا پێش دووماهییا كۆپا ئیراقێ پشتی سەركەڤتنەكا گرنگ و ژ هەژی ل سەر مێڤانا خوە یانەیا نەورۆز ئینایی ب گۆلەكێ بێ بەرانبەر، د یارییا واندا ئەوا ل درەنگییا شەڤا سێ شەمبییا بۆری یاریگەها زاخۆ ب بەرهەڤبوونا جەماوەرەكێ زوور دناڤ یاریگەهێ دا هاتیە كرن، گۆلا زاخۆ ژلایێ پیشەكارێ وێ یێ یەمەنی ناسر محەمەدو د خولەكا 75 دا هاتبوو تۆماركرن.
دلژار عەدنان: دەستڤەئینانا ناسناڤی ئارمانجا مەیە
لدۆر سەركەڤتنا تیما زاخۆ دلژار عەدنان ئەندامێ كارگێرییا یانەیا زاخۆ گۆت: پیرۆزباهیێ ل هەموو پشتەڤانێن زاخۆ دكەم ئەون نمرە ئێك و پالدەرێن مەزنن بۆ سەركەڤتنان، بۆ یارییا بەرانبەر نەورۆز هەموو بەرهەڤی هاتبوونە كرن و ب شێوەیەكێ پرۆڤێشنال پشتەڤانان نیشاندان كرن و یاریزانێن مە ب مۆرالەكا بلند شیان سەركەڤتنەكا ژ هەژی بینن، سەركەڤتنا ڤێ یاریێ دێ مە نێزیكی ئارمانجا مە یا سەرەكی یا ئەڤ سالە كەت، دەلیڤەیەكا گرنگ بەرانبەری مەیە و دێ ل سەر پلانێن خوە بەردەوامبین.
زاخۆ دێ یاریێ دگەل كێ كەت و كەنگییە؟
ب سەركەڤتنا یانەیا زاخۆ بەرانبەر نەورۆز بڕیارە ل شەمبییا بهێت یارییا خوە یا پێش دووماهیێ بەرانبەر یانەیا شورتە قارەمانا وەرزێ ئەڤ سالە یا خولا ستێرێن ئیراقێ بكەت، ئەوا دێ ل یاریگەها یانەیا زاخۆ ل دەمژمێر 10ی شەڤ هێتە كرن، تیما شورتە د یارییا چارێك دووماهیێ دا ب سەركەڤت بوو ل سەر یانەیا تەلەبە ب لێدانێن پەنەلتییان 4-1 پشتی دەمێ زێدەكری یێ یاریێ ب گۆلەكێ ب دووماهی هاتی.
شرۆڤەكارەكێ وەرزشی ژی بووچوونا خوە هەبوو
ژلایێ خوەڤە شرۆڤەكار و چاڤدێرێ وەرزشی بۆ رۆژنامەیا ئەڤرۆ گۆت: پێخوەشحالین دو یانەیێن دەڤەرا بەهدینان گەهشتینە قۆناغا پێش دووماهییا كۆپا كەنداڤی و ئەڤ چەندە ژی ب یا كێم نینە و ب سانەهی نەبوویە، دەلیڤەیەكا ئەلماسی بەرانبەر هەردو یانەیان هەنە كۆ ب گەهنە فینالێ و ئێك ژ هەردو یانەیان ناسناڤی بۆ بەهدینان بینت، راستە ئەركێ وان ب سانەهی نابیت بەرانبەر یانەیێن جەوییە و شورتە، لێ ب خواندن ناسناڤ د دەستێ یانەیێن دهۆك و زاخۆ دایە بلا بزاڤێ بكەن ژ دەست نەدەن و ب پلان سەرەدەریێ دگەل دا بكەن و هوژداریێ دابن، ئەڤ دەلیڤە یا ب زەحمەت دوبارە بیتە ڤە.
بۆ زانین كۆپا ئەڤ سالە دبیتە یا 26ێ دهێتە كرن، یانەیا زەورا پترترین ناسناڤ ب دەستخوەڤەئیناینە كو 15 جاران بوویە قارەمان، جەوییە چار جاران، هەر ئێك ژ تەلەبە، ئەلرەشید، جەیش جودا دو ناسناڤ ئیناینە و سیناعە جارەكێ بوویە قارەمان.
