ترامپی دڤێت ب رێیا ناتۆیێ هاریکاریا ئۆکرانیایێ بکەت
بەرپرسەکێ وەزارەتا دەرڤە یا ئەمریکا بۆ مالپەرێ ئاکسیۆس یێ نووچەیان دیار کریە، دۆنالد ترامپێ سەرۆکێ ئەمریکا ژ ئێڕشێن ڤێ دووماهیێ یین رۆسیا ل سەر ئۆکرانیایێ گەلەک دلگرانە و وەسا دبینیت کو پوتین بەرهەڤ نینە شەڕی راگریت و هەکە هاریکاریا ئۆکرانیایێ نەهێتە کرن ئەو یەک دێ بیتە ئەگەرێ مەترسیەکا گەلەک مەزن بۆ ناتۆ، وەلاتێن ئێکەتیا ئۆرۆپا و بەرژەوەندیێن ئەمریکا ل هەموو جیهانێ.
هەمان بەرپرسی ئەو یەک ژی دیار کریە، ترامپی بریار دایە چەکێن مۆدێرن و گران ب رێیا ناتۆ بدەتە ئۆکرانیایێ، ئانکو ئەمریکا ب رەنگەکێ راستەوخوە چەکی نادەتە ئۆکرانیایێ، بەلکو دێ ب رێیا ناتۆ بیت و ئەو یەک ژی دێ کاریگەریا خوە ل سەر شەڕێ د ناڤبەرا رۆسیا و ئۆکرانیایێ دا هەبیت، چونکی ترامپ وەسا دبینیت ب رێیا چەکێ گران و مۆدێرن دێ لەشکرێ ئۆکرانیایێ شێت دربێن مەزن ل رۆسیا دەت و وی دەمی دێ پوتین ژی نەچار بیت ل گەل ئۆکرانیایێ دەست ب دانوستاندنان بکەت و شەڕی بدەتە راگرتن.
